Shillong, Naitung 13: Katto katne ngut ki MLA na ka Sorkar Meghalaya Democratic Alliance (MDA) kila pynpaw ia ka jingbym lah ban iashimbynta ha ka jingiathep vote ha ka elekshon President ka Ri, ka ban long ha ka 18 tarik Naitung.
Ia kane la pyntip da u Myntri Rangbah ka Jylla Conrad Kongkal Sangma hynne ka sngi balang, kaba long hadien shisngi ba u pynlong ia ka jingialang jong ka Meghalaya Democtatic Alliance (MDA).
“Hooid, kin don ar-lai ngut ki MLA ki ban nym lah ban thep vote namar kin ym don satia ha Shillong bad kine kila dep ban pyntip lypa shuwa ka por” ong u Conrad haba iakren bad ki nongthoh khubor haba pynpaw pat ia ka jingngeit kaba skhem ba ka vote jong ka MDA kan leit pura kat kaba don sha ka kyrtong ka NDA.
Haba pyntip ba ha ka jingialang ka MDA la air uh ia ki jinghikai sha ki MLA ba kumno kin thep vote, u MYntri Rangbah ula ong “Watla ka dei ka kam kaba suk bha hynrei ki don ki khep ba ngi iabakla. Namar kata, ngi la iakren ia kane ka kam ha ka jingialang” haba bnrap ba ki don ruh ki kam ba iadei bad ki katto katne ki MLA kiba la iakren ha ka jingialang.
Ka kynhun synrop MDA ka don haduh 48 ngut ki MLA kiba dei na ki seng sain pyrthei bapher bapher bad ki MLA shimet.
Ka Nongialam ka Congress Legislature Party (CLP) Kong Ampareen Lyngdoh dang shen kala pynpaw ia ka jingbym sngewtynnad halor ka jingbym lah jong ka BJP ban khot lang ia ki 5 ngut ki MLA sha ka jingialang ban pan jingkyrshan ia ka Draupadi Murmu ba long ha ka 6 tarik Naitung bad ong “Shen ngin sa shim ia ka rai halor ka sienjam ba dei ban shim”.
Haba kylli kumno un pynthikna ia ka jinglong kawei jong ka MDA sha ka elekshon, u Myntri Rangbah ula pyntip ba yn sa pynbeit ia kiei kiei baroh hapdeng ki paralok ba iatreilang bad ong “Ngin sa kyrpad ia baroh. Lada don ka jingbym biang, ngin sa wad ia ka lynti kumno ban pynbeit ia kane”.
