Shillong, Nailar 16: U Myntri Rangbah ka Jylla Conrad K Sangma ha ka sngi Balang, ula plie paidbah ia ka karkhana pynmih sboh marrep (biofertilizer) ba nyngkong eh ka Jylla, kaba don ha ka shnong Kyiem, Mawphlang.
Kane ka karkhana ka don jingthmu ban nang pynshlur shuh shuh ia ka kam rep marrep khlem dawai bad ban pynthikna ha kaban lah pyndap ia ka sboh marrep ba khlem khleh kynja dawai.
Haba plie ia kane ka karkhana, u Myntri Rangbah ula ong ba kane ka kharkhana kan kyrshan ia ka sienjam jong ka Sorkar Jylla ban pynkylla ia ka rep ka riang sha ka rukom rep ba khlem ai dawai ne ka organic agriculture.
“Ka thong jong ngi ka long ban pynshlur ia ka rep khlem khleh dawai ha baroh kawei ka Jylla bad kane ka biofertilizer ka dei kawei na ki kam ba kongsan jong kane ka lynti ba ngi shim” ula ong.
U Myntri Rangbah ula ban jur ba ka jingpynlah pynbiang ia ki sboh khlem dawai ha ki iew ki hat ka long kaba kongsan bha ha kaban lah pynurlong ia ka thong jong ka oragnic movement.
“Ka kam rep khlem khleh dawai ka shaniah tylli ha ka jingioh iaki sboh khlem dawai. Lada ngim lah ban pynthikna ia ka jingioh ia kane ka sboh, ha ka dor kaba dei bad ka pork aba biang, baroh ki jingpyrshang jong ngi kin shu sepei noh” ula ong.
Kumba long mynta, ka jingdonkam jong ka Jylla ia ka sboh khlem dawai ka kot haduh 25,000 metric ton. Namar ka jingrep khlem sboh dawai kala nang kiew bad nang pur sha kiwei kiwei ki bynta jong ka Jylla, la khmih lynti ba ka jingdonkam ia kane ka sboh kan nang kiew nang kiew.
U Myntri Rangbah ula pynpaw ia ka jingsngew skhem ba kane ka karkhana pynmih sboh biofertilizer kan shim ia ka bynta ba kongsan bha ha kaban pyndap pynbiang ia ka jingdonkam sboh jong ka thain bad ka Jylla baroh kawei.
Pule ruh: Plie u CM bad u Myntri iaki jingtei kam jngohkai ‘Travellers Nest’ ha Mawphlang
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
 ba nyngkong eh ka Jylla, kaba don ha ka shnong Kyiem, Mawphlang.){kind=link}