Shillong, Naitung 13: Ka Sorkar Jylla kala dep pynkhreh ia ka blueprint ban ai haduh 3 acre ka jaka na ka bynta ban tei ia ki Iing, ban pynkynriah ia ki 342 tylli ki Longiing jong ki paid Harijan kiba pynkynriah na Them Metor, Them Iew Mawlong.
Ia kane la pyntip hakhmat ka Iingkashari Meghalaya High Court hynne ka sngi balang, kaba shong bishar ia ka mukotduma bala mudui da ka Harijan Panchayat Committee (HPC) pyrshah ia ka Sorkar Jylla.
Ha kane ka hukum, ka Iingkashari kala pyntip ba ka Jylla kala aiti ia ka blueprint bala pynkhreh da ki bor Sorkar ban ai 3 acre ka Jaka hajan ka RP Chest Hospital, naka bynta ban tei ia ki Iing bun mala, ban pynsah ia ki briew ba pynkynriah na Them Metor.
“La kyrmen ba kane ka kam kan kut noh da kane ka jingtyrwa ka Sorkar Jylla lada ki nongmudui ki hun ia ka” kala ong. Ka Iingkashari kaba buh ban shong bishar biang ia ka kam ha ka 4 tarik u Nailar.
Ha ka 25 tarik Iaiong, ka Harijan Panchayat Committee (HPC) kala mynur ia ka jingpynkynriah noh na Them Iew Mawlong halor ka kyndon ba ka Sorkar Jylla ka dei ban ai haduh 200 square meter ka jaka sha man ki 342 tylli ki Longiing hapoh u pud u sam jong ka European Ward nalor ban bei pisa ruh ia ka jinglut jingsep ban tei iing.
Hynrei, kala mih ka jingpyrshah kaba jur na ki katto katne ki Sengbhalang ia kane ka jingdawa ka Harijan Panchayat Committee haba maham ruh “Ka thma kan sa khie” lad aka Sorkar ka pyndem tdong ia kum kane ka jingdawa.
Ha ka 4 tarik Jymmang, u Symbud Myntri Rangbah ka Jylla ula ong ba ka blueprint kan pynpaw ia ka nongrim jong ka Sorkar Jylla halor ka jingdawa jong ka HPC. Ula pyntip ba hadien bala dep pynkhreh ia ka blueprint, yn sa aiti sha ka HPC ba kan ai ka jingmynjur.
