Imphal, Nailar 15 : U Myntri Rangbah ka Manipur Nongthombam Biren Singh ula buh ika jingkyrpad ia ki Nongshongshnong ka Jylla ban wanrha noh ia ka jingsuk ha ka Jylla bad ong “Da ka jingiamap bad iaklet noh hapdeng jong ngi, ngin lah ban ia imsuk imsain bad bteng ia ka jingiaid lynti lang ha ka roi ka par kaba ngi lah duh mynta la palat lai bnai”.
Ka jingiaumsnam kala shim ia ka jingim jong kumba 180 ngut ki briew, pynphet wir ia palat 60,000 ngut bad ki nongkynti ba kot da ki spah klur kila shah pynjot pynjulor.
“Ki kam umsnam kin ym wanrah ia kano kano ka roi ka par. Lada ka don kano kano ka jingiasngewthuh bakla ne jingbym ia shai hapdeng ki jaidbynriew, ngi lah ban iashong ha ka miej jingiakren bad iatai ia baroh ki jingbym biang. Na ka bynta kane, ka jingkhang jong ngi kan iai plie beit” ong u Biren Singh na ka rynsan rakhe ia ka Independence Day ba 77 snem ka Ri hadien bala dep pynher ia ka lama lai rong.
U Myntri Rangbah ula ong ba kum shibynta jong ka Ri bad haba bud pyrrkhing bha ia ki kyndon Riti Synshar, ka Sorkar kala iai bteng ban trei na ka bynta ka jingbha bad jingkyntiew ia ka Jylla la ka dei ka Hills ne Valley District. Hynrei, katto katne ki khwai mynta bad ki bor ba nabar ka Jylla kila pyrshang ban leh ia ki kam kiba ktah ia kane ka Jylla ba shongsuk jong ngi.
Ula ong ba ka Sorkar Jylla kam ju leh ia kano kano ka kam bad kan nym leh ruh ia kano kano ka kam kaba iaid pyrshah ia ki kyndon ka Riti Synshar ka Ri. Ula ong “Lada ngi la leh ia kane, ka Sorkar kan jin da neh sah haduh mynta”.
Haba kyrpad ia ki nongshongshnong ba kin kiar ia ki kam iaumsnam, u Myntri Rangbah ula ong ba ka Sorkar jong u kan iai bteng ia ka thma pyrshah ia u droks bad ban bat ne set ia ki briew kiba wan rung beain kat kumka Riti Synshar ka Ri.
“Kane kan ym long pyrshah ia kano kano ka JAaidbynriew. Lad aka don kano kano ka jingiasngewthuh bakla ne jingbym ia shai, ngi lah ban iakren lang khnang ban ngin lah ban wanrah pat ia ka jingsuk bad ban ia iaid lang ha ka lynti sha ka roi ka par” ula ong.
Pule ruh: Rakhe ka Meghalaya ia ka I-Day hapdeng ka jingshunkun, sam u CM ia ki khusnam bapher bapher
