Nongpoh, Nailar 11: Ka Synjuk ki Rangbah Shnong Border Area jong ka Raid Nongtung mynta ka sngi ka la ai khublei ia ka sorkar jylla hadien ba ka ka wan rah biang ia uwei na u MCS Officer ha Ri Bhoi, kaba dei hadien shipor u la shah pynkynriah na Ri Bhoi ha ka election jied nongmihkhmat kaba dang shu dep shen ha ka jylla.
Kum ban pynkynmaw, une u MCS Officer uba la shah pynkynriah kam shipor sha Jaintia Hills ha ka election jied Nongmihkhmat kaba dang shu dep shen ha ka jylla, u dei u Raja Brahma, uba la bat kum u Border Magistrate ka Ri Bhoi bad mynta pat u la ioh ban bat kum u Project Director ka DRDA nalor ka kyrdan kum u Additional Deputy Commissioner ha Ri Bhoi.
Haba ia kren mynta ka sngi bad ki Nongthoh Khubor, u President ka Synjuk ki Rangbah Shnong Boder Area ka Raid Nongtung, u Bah Blik Star Sohtun, u la ong ba ka synjuk ka sngewkmen ba une u ophisar u la wan phai biang sha Ri Bhoi District ban ai ka jingshakri sha ki paidbah bad kum ka synjuk ka sngewkmen namar ka lap bad shem ba une u ophisar u dei u ophisar ba biang tam ban ai ka jingshakri sha ki paidbah khamtamm sha ki paidbah khappud kiba ju mad jingeh na ki kam pud kam sam bad ka sorkar Assam ha Block II ba hap ha ka Raid Nongtung ha Ri Bhoi District.
U la ong ruh ba ka synjuk ka sngewkmen ruh ban tip ba hadien ba u la wan phai biang sha Ri Bhoi District kum u additional deputy commissioner ka Ri Bhoi, u la ioh bat ruh kum u Project Director ka DRDA ha kaba kum ka synjuk ka khmih lynti ba shibun ki kam pynroi kin poi sha ki shnong khappud ka Meghalaya ha Block II.
“Ka synjuk ka sngewkmen ruh ban wan biang une u ophisar ka dei namar ba ha ki por va la leit noh kum u ophisar u la shakri ym tang ban wan rah ia kiba bun ki kam pynroi sha ki shnong khappud hapoh ka Raid Nongtung (Block II), hynrei u dei ruh u ophisar uba don ka bor ban ia pynibor ia ka sorkar Assam khamtam halor ki kam thombor ka Assam pyrshah ia ki nongshong shnong ha Block II” ong u Bah Blikstar Sohtun.
