Shillong, Nailar 11 : Ka Sorkar Jylla ha ka sngi thohdieng, kala rai ban pynshong nongrim bha bad ban buh da u pud ia ka jingleit bar-ri jong u Myntri Rangbah ka Jylla, ki Myntri Sorkar bad ki Ophisar ka ban long noh tang arsien ha kawei ka snem mang tyngka.
Ka Sorkar kala shim ia kane ka rai ha ka jingialang jong ka Kynhun Myntri kaba la pyniaid da u Myntri Rangbah ka Jylla Conrad K Sangma.
Haba iakren bad ki nongthoh khubor, u Myntri Sorkar bad Nongaiktien ka Sorkar MDA Bah Paul Lyngdoh ula ong, hooid, katto katne na kine ki jingleit bar-ri ki dei halor ka jingshah khot sngewbha, ki jingialang, ki jingleit delegation bad kumta ter ter ha ki prokram bapher bapher kum ki project ba bei tyngka na shabar ri, ka capacity building programme bad kiwei kiwei.
“Hynrei haba buh hakhmat ia ka pla tyngka ka Jylla bad ruh halor ka jingdonkam ban pynshong nongrim bha ia kine ki jingleit, la shim ia ka rai ba nangne shakhmat, ka jingleit bar-ri jong ki Heh ka Sorkar Jylla kynthup ki Nongtrei contract kan long noh tang arsien ha kawei ka snem mang tyngka” ula ong.
“La rai ruh ba lada ujuh u Ophisar u hap ban leit jingleit arsien, u dei ban aiti shuwa ia ka progress report (kaiphod) jong ka jingleit ba nyngkong bad da ka jinglah jong u ban aiti ia ka kaiphod kaba pynhun bad kaba pyni ia u soh, yn sa lah ban ai jingbit ba un leit biang sa shisien” ong u Bah Paul haba bynrap ba la shim rai ruh ba ka Sorkar ka lah ban bei pisa tang kawei ka jingleit bad ia ka sien kaba ar yn hap ban bei da ka Sorkar India lane kino kino ki Agency ba nabar Ri.
“Kaba la pyllait noh ka long satang lada kine ki Heh Sorkar ki leit sha ki bar-ri ban pdiang ia ki khusnam na ka bynta ka Sorkar Meghalaya” ula bynrap.
Haba kylli, u Bah Paul ula ong “Ka mat hi ka long ba ka don ka jingkyrpad na baroh bad ki jingleit donkam shabar jong ki Ophisar bapher bapher ia kaba hap ban ioh jingbit na u Myntri Rangbah ka Jylla. Hynrei mynta ka Sorkar kala rai ban da pynshong nongrim bha ia kum kine ki jingleit, pynduna ia ka jingleit shabar-ri tang arsien bad ruh ban aiti ia ki kaiphod khnang ba kan ym don shuh ka jingpynsyrwa kai ia ka pisa u paidbah”.
“Haba iadei pat bad ki Myntri Sorkar, kumba phi tip ba kane ka shong ruh ha ka jingai jingbit jong ka Ministry of External Affairs (MEA) bad dang shen, ka MEA kala wanrah ia ka kyndon ba pyrrkhing bha wat ban ai jingbit ia kum kine ki jingtyrwa leit jingleit shabar ri. Kane ka kynthup wat ia u Myntri Rangbah ka Jylla. Kane kan hap lang hapoh kane ka rai kaba mut uwei u Heh Sorkar kawei ka jingleit sha bar-ri ka ban shong kat kum ka kaiphod ba un ai” ula ong.
Halor ka jingkylli, u Bah Paul ula ong ba ki don ki khep ba ki Heh Sorkar kila leit sha bar-ri bad kila aiti ia ki kaiphod bad don ruh ki bym ai kaiphod lane ki kaiphod kim ai jinghun satia.
“..namar ngi la iaid mynta ha ka lynti ba donkam ban ioh kheit ia u soh bad kaei kaba ngi ong mynta ka dei ka rai ka Sorkar, ba ki Myntri kin hap pyni ia u soh haba ki leit jingleit sha bar-ri” ula ong.
