Nongpoh, Nailar 08 : Ka seng Hynniewtrep Integrated Territorial Organization (HITO), Ri Bhoi District unit, kala dawa ia ka Sorkar Jylla ba kan pynsted noh shaid shaid ha kaban tei pyndep ia ki jingtei jong ka Tnad ka Koit ka Khiah ha Ri-Bhoi District khamtam ka Maternity & Child Hospital (MCH) kaba don ha ka shnong Umran.
Kane ka seng kala buh ia kane ka jingdawa lyngba ka shithi bala phah sha ka Myntri ka Koit ka Khiah Kong Ampareen Lyngdoh, ban pynkynmaw biang ia ki jingkular ba kala khlei ha kaban tei pynsted ia ka Maternity & Child Hospital (MCH) ha Umran.
Haba iakren bad ki nongthoh khubor, u President Bah Banpynskhem Kharnaior ula iathuh ba ka HITO ka angnud shikat dei eh ba ka Sorkar kan bat iala ka kular bala khlei sha u paidbah halor ki jingtei bapher bapher ha Jylla khamtam kiba don ha Ri-Bhoi District, ki ban ai jingmyntoi ia u paidbah babun balang khamtam kito kiba wan na ka longiing baduk.
Kane ka Seng ha kane ka shithi kala pynkynmaw ia ki jingtei kiba dang sahteng ban pyndep khamtam ka MCH Hospitao kaba la kular ban pyndep hapoh ka 6 bnai khnang ban lah plie noh ia kane ka hospital hapoh u bnai Nohprah 2023.
Nalor kane, kala kdew ruh ia ka Ayush Hospital ha Shnong Umtrew, ki jingtei ha Lumsohpetbneng jong ka tnad Tourism, ka Ophis u DMHO, ka Model College ha Jirang, ka Residential School ha Mawtari Mardon, ka Polytechnic ha Nongkhrah Nongpoh bad kiwei kiwei ki jingeh kiba la sahteng hapoh ka District.
