Shillong Nailar 04: Ka North-Eastern Hill University (NEHU) hynne ka sngi Thohdieng, kala iasoi iaka Memorandum of Understanding (MoU) bad ka Indian Institute of Technology Guwahati (IIT Guwahati) ban iatreilang ha kaban kyntiew iaka jingleh Research ne jingwad bniah ha kaba iadei bad ka Nanotechnology.
Kane ka ka MoU ka dei kaba la iasoi da ka jingthmu ban kyntiew ia ka kam Research ha ka Nanotechnology, ban pyndonkam ia ki Nanoelectronics, Semiconductor Devices, Nanophotonics bad Nanofabrication.
Kan don ruh ka jingpynlong prokram mar kylliang hapdeng ki nonghikai, ki scholar bad ki samla pule khnang ba kin ioh iaka jingpyntbit ha katei ka bynta da ka jingthmu ban kyntiew ha kaba iadei bad ka juk stad saïañ hapdeng ka NEHU bad IIT, Guwahati lyngba ka jingiatreilang.
U Prof Prabha Shankar Shukla, Vice-Chancellor ka NEHU, ula pynpaw iaka jingsngewtynnad halor katei ka jingiatreilang bad ula ong ba kane ka jingiasoi Soskular kadei ka jingjam sha uwei pat u mawmer ha ka lynti iaid jong ka NEHU na ka bynta ban pynjanai ha kaba iadei bad ka kam wad bniah.
“Ka jingiatreilang ka jong ngi bad ka IIT Guwahati kan wanrah iaka jingiadei kaba iajan khamtam ha kaban pynlong ia ki jingwad bniah ha kaba iadei bad ka Nanotechnology bad ban plie iaka jingkhang na ka bynta kiwei pat ki lad na ka bynta ki samla pule bad ki nonghikai” ong u VC ka NEHU.
Kawei na ki bynta ba kongsan jongka MoU kadei ban pynlong ia ki Short- Term Course bad ki Training Program lyngba ka INUP-i2i program bad ia kine ki course yn pynwandur ha kaban kyntiew iaka sap bad jingshemphang ki nonghikai bad samla pule bad ban plielad ia ki ba kin wad bniah ia ki bynta kiba iadei bad ki Nanotechnology.
Ka NEHU bad IIT Guwahati kin iatreilang ruh ha kaban pynlong ia ki workshop, seminar bad ki short-term awareness program bad kine ki prokram kin long kum ki rynsan ban pynsaphriang ia ki jingnang jingtip bapher.
Ka Department of Nanotechnology jongka NEHU kan plie ia ka bynta kaba kongsan ha kaban iatreilang hapdneg kine ki ar tylli ki jaka pule bad ka skulbah NEHU kala dep ruh ban buh iaka Center ban pule iaka M.Tech and Ph.D. ha ka Nanotechnology.
Ka M.Tech program ha ka Nanotechnology hapoh NEHU ka long ban plie lad ia ki samla pule kiba don ia ki jingshemphang ha ka lain Engineering kum ka Nanotechnology, Biochemical Engineering, Biomedical Engineering, Biotechnology, Chemical Engineering, Electronics Engineering, Energy Engineering, Electrical Engineering, Mechanical Engineering, Metallurgical Engineering bad kumjuh bad kito kiba dei ki M.Sc. haka Nanoscience, Physics, Chemistry, Material Science, Electronics, Biotechnology, Biochemistry.
Ka Department of Nanotechnology kadei kaba la don ruh ia ki tiar ki tar na ka bynta ban ai jinghikai ia ki samla pule bad ban leh ia ka Research bad kane ka tnad ka pynthikna ba kan iaid ryngkat bad kane ka juk kaba mynta ha kaba iadei bad ka nanotechnology ban pynthikna ba ki samla pule bad ki nongleh Researchers kin long beit hakhmat.
