Shillong, Naitlar 02 : U Myntri Rangbah ka Jylla Conrad K Sangma ha ka sngi Balang, ula ong baka Sorkar Jylla ka dang ap ia ka kaiphod jingtohkit Magistrate halor ka jinghiar thma ki paidbhur ia ka Chief Minister Office (CMO) ha Tura ia kaba ki Pulit kila pynman ba ka dei ka jingsylla ban pyniap ia u.
U Conrad haba iakren bad ki nongthoh khubor ula ong ba ka Sorkar kala thung ia ka jingtohkit Magistrate ban tohkit ia kane ka jingjia hiar thma ki paidbhur ka bym pat ju jia koit.
“Kumta nyngkong ngin ap shuwa ia ka (tohit magistrate) ban pyndep. Lada donkam, ngin sa shim ia ka rai (ban thung ia ka jingtohkit ba laitluid). Hynrei ia mynta, ka jingtohkit Magistrate ka dang iaid shakhmat” ula ong haba pyntip ba kane ka jingtohkit kan ym shim por than ban aiti ia ka jingshem jong ka.
Haduh 47 ngut ki briew kila shah kem halor ka jingkynnoh donkti ban kynshoit iaki paidbhur ba kin hiar thma ia ka CMO bad palat 18 ngut ki Pulit kila mynsaw na ka jingshah lun maw kaba la jia ha ka por ba u Myntri Rangbah u dang iashong jingialang bad ki nongmihkhmat Sengbhalang kynthup ka ACHIK kaba dawa ia ka backlog policy bad ka winter capital ha Tura.
Halor ka jingkren u Deputy Commissioner ka West Garo Hills ba kam shym don satia kano kano ka jingiasylla ban shim ia ka jingim u Myntri Rangbah, u Conrad ula ong “….Kumba nga tip, u DC ula ai ia ka jingpynshai hadien bad ha kane ka jingpynshai ula kdew ba um thoh lut ia kaba kaba u kren bad u mut. Nga tharai kan bha shibun ban kren ia u”.
U Myntri Rangbah ula kular ruh ba kiei ki sienjam bala shim ia ki nongpynkulmar ka dei kaba la shim kat kum ki sakhi satar.
“Haba ong ia kane naduh ka sngi ba nyngkong, nga la ong ba kaei kaba ngin leh bad kaei kaba dei ban jia ai ba kan jia, hynrei baroh kin long kat kum ki jingshisha bad ki sakhi bala lap bad kan long ruh kat kum ki sakhi” ula bynrap.
Haba kylli, u Conrad ula ong “…Kat kaei kaba jia, ki Pulit ki la iaid hala ka jong ka lynti bad pynthikna b aka shongsuk shongsain kan neh”.
