Shillong, Naitung 31: Ka Myntri ka Koit ka Khiah Kong Ampareen Lyngdoh ha ka sngi Nyngkong, kala pyntip ba ka Sorkar Meghalaya kala tyrwa ban ai da ka ‘Cashless Health Card’ sha baroh ki Nongtrei Sorkar.
“Mynta ka Sorkar Meghalaya kala pynkhreh ia ka cabinet memo ba thymmai ban wanrah hapoh ka cabinet ia ka cashless card ia ki nongtrei Sorkar” ong ka kong Ampareen haba iakren bad ki nongthoh khubor.
Kala ong ba kaei kaba jia ha ka Central Government Health Scheme (CGHS) list ka long baka Sorkar Pdeng ka rai ia ka jingsiew ban ai jingsumar ia ki katto katne ki jingpang naka bynta ki Nongtrei Sorkar.
“Haba phai sha ka thain Shatei Lam Mihngi, ka Sorkar India kam pat pynthymmai ia ka song pisa jong ka CGHS la slem bha bad ka dei ka Sorkar Meghalaya bad kiwei ki Jylla kiba la kren sha ka Ministry bad kyrpad ia ka ba kan pynthymmai noh ia ka song pisa jong ka CGHS” ong ka kong Ampareen.
Kala bteng “Kum ka nuksa, ki Nongtrei ka Sorkar Pdeng nga sngew ba ki don ia ki cashless card katba ngi ha ka Jylla Meghalaya ngim pat leh satia. Ngi la nang jam sha kata. Ngi la pynkhreh ia kane bad ngi kyrmen ba shen, ki nongtrei jong ka Sorkar, kiba ioh ia ki reimbursement (iohbiang ia kaba pynlut haba leit sumar jingpang) kin sa ioh noh shen”.
Ka Myntri kala ong ruh ba ka Sorkar ha ka jingshisha kala khmih sha ka Meghalaya Health Insurance Scheme (MHIS) kum kawei ka tyllong ban ai jingiarap ia ki nongtrei Sorkar haba siew pat ia kaei kaba ki pynlut haba leit sumar jingpang.
Also read: Khreh palat 1046 ngut ki nos ban leit trei shabar ka Ri India
