Shillong, Naitung, 31: U Myntri ka tnad Social Welfare Bah Paul Lyngdoh hynne ka sngi nyngkong ula kyntu iaka Myntri jong ka Sorkar Pdeng kaba khmih iaka tnad Women and Child Development ka Smriti Zubin Irani ban buh ia ki Integrated Child Development Services (ICDS) Centre ha ki 1500 tylli ki shnong kiba don ha Meghalaya.
Haba iakren bad ki nongthoh khubor lyngba ka Video Conferencing na New Delhi, u Bah Paul Lyngdoh ula ong ba ka Myntri ka sorkar pdeng kala ai iaka jingkular ban pyllait iaka bhah kaba 90 percent naka sorkar pdeng hadien ba la lah ban pyniadei bad ka bhah10 percent jong ka jylla na ka bynta ban buh ia ki ICDS centre ha ka jylla.
Ula ong, palat 1500 tylli ki shnong ha Meghalaya kim pat ioh iaka jingmyntoi naka ICDS, ia kaba la pynwandur ban kyntiew iaka bha ka miat jong ki khynnah hapoh 6 snem ka rta lyngba ka jingai jingshakri jong ki nongri nongsumar bad ki shnong ki thaw ha ryngkat bad ka pynbiang iaki jingai jingshakri ha ki shnong ki thaw.
U Bah Paul ula iathuh ba ka jingtei iaki ICDS centre ha kylleng ki jaka kan long ha kiwat bapher bapher.
Ula pyntip ba ka myntri ka sorkar pdeng kala pynthikna ba ka jingpyntreikam iaka Supplementary Nutrition Programme (SNP) lyngba ka ICDS kan iai bteng hapoh ka jylla Meghalaya.
Kham hashwa, ka sorkar pdeng kala byrngem ban pynsangeh noh iaka SNP namar ka jingsheptieng namar kiba bun kiba dei ban ioh jingmyntoi kim shym la don iaka aadhaar card.
“Haba nga la shimti iaka tnad, ka jingshim aadhaar card ka long tang 13% hynrei naduh u Jymmang bad Jylliew kala kiew shaduh 95% bad haduh mynta kiba la shim iaka aadhaar card ki long 97%,” ong u Bah Paul.
Nalor kane, ula iathuh ba ula shimkhia ruh halor ka mat jong ka jingsahteng ban pyllait iaka tulop ba saw bnai jong ki nongtrei Poshan ha ka jylla bad na ka liang ka Myntri jongka sorkar pdeng kala pynthikna ban pyllait noh ia katei ka pisa hapoh ar bnai. Ula iathuh ba shen yn sat hung noh kumba 2-3 ngut ki Additional DPO.
Ha kaba iadei bad ka Nirbhaya Scheme, u Bah Paul Lyngdoh ula iathuh ba ka tnad kan sap hah ia ka jingtyrwa na ka bynta ban ithuh bad ban tei ia ki jingtei kiba donkam na ka bynta ki kynthei kiba shong basah ha ki thaiñ khappud jong ka jylla.
Pule ruh:Â Kloi ka HNYF ban iarap ia ki briew ba shah dawa pisa ha kyrteng ka HNLC
 Centre ha ki 1500 tylli ki shnong kiba don ha Meghalaya.){kind=link}