Shillong, Naitung 31: Tang da ki sngi hashuwa ka jingleit jurip jong ki Myntri Rangbah ka Jylla Assam bad Meghalaya ia ka Khanduli, ka shnong khappud ka Meghalaya ba iakajia bad ka Assam, ka jingkulmar kala jan khie hynne ka sngi Nyngkong ha kane ka shnong lym da kloi ki bor District kiba don ha katei ka jaka ba kin tem noh wut wut.
Kane ka jingkulmar kala jan khie na ka jinghiar jong ki Nongialam bad ki Dkhot ka Jaintia Students Movement (JSM) sha Khanduli da ka jingthmu ban pynpra ia ka khyrdop lum khajna bala pynieng da ka Karbi Anglong Autonomous Council (KAAC) ha Khanduli.
Ka Jaintia Students Movement (JSM) da ki bnai kala pynlong ia ki jingiakhih bapher bapher bad ka jingiashong kyllain mungor halor ka jingdawa ban weng noh ia kane ka khyrdop khrong khajna ka KAAC.
Hynrei ia kane ka sienjam ba thmu ban shim da ka JSM la lah ban khang da ki bor pyniaid District ka West Jaintia Hills lem bad ki Pulit kiba don ha kane ka Shnong. Watla kane kala lam sha ka jingiania kaba jur bha hapdeng kane ka seng bad ki bor District, khatduh kane ka seng kala kynran dien noh da ka jingpyntip ba ki Myntri Rangbah na Assam bad Meghalaya kin sa leit jurip shen ia kane ka shnong ha kine ki khyndiat sngi ban wan.
La pyntip sha ka JSM da u Assistant District Magistrate ba u Myntri Rangbah ka Assam bad Meghalaya, kin sa leit jurip ia ka shnong Khanduli ha ka 3 tarik Nailar, 2023 bad kin sa iakren ruh halor kane ka khyrdop ka KAAC nalor ka kam iakajia pud.
Haba iakren bad ki nongthoh khubor, u President ka JSM ula pynpaw ba ka jingdon jong kane ka khyrdop lum khajna kala long ka jingpynwit ia ki nongshongshnong bad ki shnong ba marjan ka Khanduli.
Ula ong ba da ka jingpyntip u District Magistrate ba ki Myntri Rangbah na baroh artylli kin sa leit iuhkjat ha Khanduli ha ka 3 tarik Nailar, ka JSM kala mynjur ban mih noh na kane ka shnong.
Ula pyntip ba ka seng kan nang iai buddien beit ia kane ka kam tad haduh bala weng ia kane ka khyrdop na kane ka Shnong, kaba la pynthut bha ia ki paidbah.
Ka shnong Khanduli ka dei ka shnong kaba ju mih bha ka jingiakynad hapdeng ki paid Pnar bad ki Karbi ba shong ba sah ha ka thain naba baroh artylli ki Jylla-Assam bad Meghalaya kila kam trai ia kane ka Shnong.
Kane ka khyrdop ba pynmih jingkulmar ka dei kaba la pynieng da ka KAAC ha u bnai Iaiong 2023 bad ka dei ruh kaba lam sha ki jingiakulmar hapdeng kine ki ar jaidbynriew kiba sah ha ka thain.
Ha u bnai Iaiong 2023, ki paid Pnar ba sah ha ka thain kila weng jubor ia ka signboard bala buh da ka KAAC bad ka Dorbar Shnong Khanduli kala pynlong ia ka rally ban pyrshah ia ka jingpynieng ia kane ka khyrdop hapoh ka Shnong.
Ha u bnai Jymmang 2023, ka jingkulmar kala khie biang hapdeng kne ki ar jaidbynriew bad ha kane ka kynti ka dei da ka jingiashoh iadat bad ka jingialun maw nalor ka jingthang ia ki iing trep. Kane ka jingjia kala jia hadien ba ka Dorbar Shnong Khanduli kala rai ban nym shah shuh ia ki Karbi ba kin iaid lyngba ka Shnong. Kane kala jia ruh hadien ba ki kynhun jong ki Karbi kila byrngem ia ki nongshongshnong Pnar ba kin leit sha ki jaka rep.
Pule ruh: Phah tohkit u DC ha ki Heh Ophisar halor ka jingujor ki Khynnah skul ka JNV
