Shillong, Naitung 30: U Lat ka jylla u Phagu Chauhan ula pynhap pyrda noh iaka 20th Annual CPA Conference , India Region, Zone-III kaba la long ha Meghalaya Legislative Assembly, Shillong.
Haba kren ha ka jingialang u Lat ka Jylla ula ong, ba ka Commonwealth Parliamentary Association ka dei kawei na ki kynhun ba la rim jong ka Commonwealth ia kaba la seng naduh u snem 1911 da ka jingthmu ban kyntiew iaka jingnang jingtip bad jingshemphang ha kaba iadei bad ka Riti Synshar, ka kam thaw Ain, ka ioh ka kot, ka imlang sahlang bad ki bynta ka dustur ha kaba iadei bad ka riti synshar paidbah khamtam eh bad ki ri kiba don ha ka Commonwealth.
Ula ong, ba ki ar tylli ki mat iatai haka jingialang kiba kynthup ia ki jingwan lynshop ki bor ka mariang bad ki lad ban pynbeit noh ia ki da kaba phaikhmat sha ka thaiñ Shatei Lam Mihngi bad ka jingpyniasoh ia ka thaiñ khnang ba kin ia ryngkat bad kiwei pat ki thaiñ haka ri.
U Lat ula ong, ka thaiñ Shatei Lammihngi kadei kaba jia bha ka jingshlei um, ka jingtwa khyndew, ka jingkhie u jumai bad kine kila ktah jur ia ka jingim bad iaka jingdon jingem jong ki paidbah bad kine kila ktah jur ruh iaka kam pynroi ha ka thaiñ.
Ula ong, ba ka jingbym biang ki surok, rel, liengsuin bad Mobile Network kidei kiba la pynsahkut bad pynsahteng ia ki kam bad kila ktah jur ruh iaka roi ka par bad iaka jingkiew jongka ka thaiñ shatei lammihngi.
U Lat ula pynpaw iaka jingkyrmen kaba skhem ba ka jingiatai ha kane ka jingialang kaba ar sngi yn lah ban pynmih ia ki buit kiba thymma ki ban pynmih iaka resol ha kaban pynmih ia ki polisi treikam kiba kongsan na ka bynta ban pynurlong iaka jingthmu ban kyntiew bad ban rah shajrong iaka ka thaiñ shatei lammihngi.
U Chairman ka CPA uba long ruh u Lamphang jongka Arunachal Pradesh Legislative Assembly u Pasang D. Sona, u Lamphang ka ïing dorbar thawaiñ ka Meghalaya u Thomas A. Sangma, u Symbud Lamphang ka ïing dorbar thawaiñ ka Meghalaya u Timothy D. Shira bad kiwei kiwei kila iadonlang ha kane ka jingialang pynhap pyrda ia ka CPA Conference kaba 20.
Pule lang ia kane: Ka jingwanrung ki Rohingya ha North East ka long kaba ishyrkhei : Himanta Biswa
