Shillong Naitung 28: Ka Meghalaya Youth Tourism Development Society (MYTDS), hynne ka sngi Thohdieng kala pynbna ba kan pynlong ia ka jingiakob thei bhabriew kaba la tip kum ka Miss Meghalaya bad Miss Teen Meghalaya 2023 ha ka 9 tarik u Nailur 2023 ha Soso Tham Auditorium, Shillong.
Ki nongialam jong kane ka kynhun haba iakren bad ki nongpathai khubor, kila ong ba ka MYTDS kadei kaba trei naka bynta ban kyntiew ia ki samla jong ka jylla ha ki kam jngohkai pyrthei, hynrei mynta ka kynti, kala phaikhmat biang ban kyntiew ia ki thei samla da kaba pynshlur iaki ba kin kiew ha ki rynsan iakob thei bhabriew bad ban pyni ruh iaka sap ka phong jongki bad iaka jingproh jabieng.
Kila iathuh ba na ka bynta katei ka jingiakob, yn pynlong iaka Audition haka 12 tarik u Nailar 2023 bad hadien ba la dep jied ia ki thei bhabriew, yn sa ai jinghikai bad jingpyntbit iaki naduh ka 12 tarik u Nailur 2023 ha Youth Hostel, Shillong bad ia katei ka jingiakob ban ioh deng iaka pansngiat yn pynlong haka 9 tarik u Nailur bad ha kane ka sngi kan don ruh ka Fashion Show na ka Butterfly Clothes and Accessories bad ki nongjop kin ioh pdiang iaka pisa kaba T. 2.80 lakh.
Ki nongjop ha ka Miss Meghalaya bad Miss Teen Meghalaya kin ioh ban mihkhmat ia ka jylla ha ki jingiakob thei bhabriew ki ban long ha ka Thaiñ bad ha ka Ri.
Kane ka rynsan kan long ruh kum ka jingplie lad ia ki samla kynthei kiba don jingthmu ha kaban rung ha ka kam Modeling, ban Ak ne ban kren paidbah bad lyngba kane ka rynsan yn ai jinghikai ia ki ban pule, ban heh bad ban pyntbit iaka spa ka phong jongki ha kajingpynkhreh na ka bynta ka lawei ka jongki hi.
Ha ki snem kiba la leit, ki nongjop ha ka Miss Meghalaya kila ioh ban mihkhmat ia ka jylla ha ki jingiakob ki bapher bapher bad ka Irene Dkhar kaba la jop iaka Miss Meghalaya 2022 kala mihkhmat iaka Meghalaya ha ka Miss Northeast 2022 bad kala ioh ia ka jingjop. Kla shah jied ruh kum ka Femina Miss India Meghalaya 2023 bad kala mihkmat haka Femina Miss India 2023.
Ka Jessica Kharlukhi, kaba la wan 1st Runner-Up Miss Meghalaya, kala ioh ban mihkhmat haka Miss Northeast 2022 bad kala shah khot sngewbha ban iaid bad ban long kum ka nongbishar ha ki Fashion Show bad ki rynsan iakob thei bhabriew ki bapher bapher.
Katba ka Daniella Shirley Majaw kaba dang bat iaka nam Miss Teen Meghalaya, kala mihkhmat iaka jylla ha ka Miss Teen Diva 2023, ha Jaipur, Rajasthan bad kala ioh ruh ia ka lad ban iaid ha ka rynsan ‘Lakme Fashion Week,’ ha ryngkat bad ki ki klur ak phlim ka Bollywood bad ki Designer kiba pawnam.
