Tura, Naitung 28: U Myntri Rangbah ka Jylla Conrad K Sangma ula pynthikna ka jingkem bad ka jingpynngat ha ka jingpynsajia ia ki briew kiba donkti ha ka jingkynshoit bad ba pynshit ia ki paidbah ban pynkulmar ha Tura, kan long beit thik kat kum ki sakhi satar.
Hynrei u Conrad ula kiar ban kynthoh ha ka liang ka kam sain pyrthei halor kane ka jingkulmar bad jinghiar thma ia ka Chief Minister Office (CMO), Tura katba u dang iashong jingialang bad ki Sengbhalang ban iasyllok halor ka jingdawa Winter Capital ban jingpyntreikam ia ka Roster System naduh ki snem bala leit noh.
“Nga kwah ban kren ia kane da kaba shai kdar ba kino kino ki ban shah kem kin shah kem thik halor ki sakhi satar. Kaei kaba jia kam dei satia kaba iahap. Nga la leit shatei da ka jingthmu ban pynbeit bad nga khlem mynjur ban leit shatei sha ka jaka ba ki don hynrei haba pyrkhat ioh ka mih ka jingiasngewthuh bakla bad pyrkhat ba ka lah ban iarap, nga la rai ba ngan leit shatei ban iakren bad ki bad ban wad ia ka lynti ban iajam shakhmat” ong u Conrad.
U Myntri Rangbah ula ban jur ba um kwah ban ktaid halor ki jingdonkti ki seng sain pyrthei haba ong ba kiei kiei baroh kin dei kiba pynshong nongrim kat kum ki sakhi.
Ula ong ruh ba ki Sengbhalang kila pynthikna ba ym don uwei na kito kiba thaw jingkulmar ne kiba hiar thma ia ka CMO, ki dei na ka seng ka jong ki.
“Na baroh ki jingkren, ki don ki kynhun ba nabar kiba iadon ha katei ka jaka bad ki bym don jingiadei eiei bad ki kynhun ba wan iakren. Kito kiba iapyrta slogan ki dei jong ki seng sain pyrthei. Ngin ym kdew ia kino kino ki seng sain pyrthei bad baroh hi kin shong kat kum ki sakhi. Lada u briew u donkti ha ka jingkynshoit, ki bor ka Ain kin shim ia ka sienjam ban leh eiei pyrshah ia u kat kum ki sakhi satar” ula bynrap.
U Myntri Rangbah ula pynkynmaw ruh ba ula shim ia ka lad ki lynti ban phikir bha haba leit sha Tura khamtam haba iohi ia ka jingjia ha ka por ba ka Myntri ka Koit ka Khiah Kong Ampareen Lyngdoh kala leit sha Ri-lum Garo bad iohi ia ka jing iaid rally da ki thuk thuk ryngkat ki lama iong.
U Conrad ula pyntip ba ula bthah ia ka Tnad Pulit ban kham tyngkai ia ka jingpyndonkam ia ka bor bad ban tehlakam ia ki paidbah khlem ka jingpyni bor.
“Ngi la ioh ia ki jingtip ba kila don ki paidbah, hynrei ngi khlem khmih lynti ba kan poi shaduh utei u pud bad ban thom da ka bor ia u Myntri Rangbah ka Jylla. Ngi la khmih lynti ia katto katne ka jingpynibor bad ia kane ngin dang lah ban iakren bad ki” ong u Myntri Rangbah.
U Conrad ula pynpaw ruh ia ka jingbym sngewtynnad halor ka jingthombor ia ki Pulit bad wat ia ka Ambulance kaba kit ia ki Pulit ba mynsaw.
Haba pynpaw ba kaei kaba la jia ka dei ka bym pat ju jia koit, u Myntri Rangbah ula pynpaw ba ka Sorkar kan ap mynta ia ki Pulit ba kin tohkit, ba kin kem ia kiba donkti bad ban wad ia ka daw jong kane ka jinghiar thma.
Haduh mynta, la jan kot 50 ngut ki briew kiba la shah kem. Katto katne ngut ki briew kynthup ki Pulit kila mynsaw na ka jingshah kawang maw bad katto katne ruh ki kali kila shah pynjulor.
“Ki kali jong ki Myntri Sorkar bad ki riew paidbah kila shah pynjulor…ka kali ki Pulit ruh kala shah thang” ong u Conrad.
Haba kylli halor ka jingkren u Nongialam ka TMC Dr Mukul Sangma ba ki Pulit kila iatreikam kat kum ka jingbthah ki Nongialam sain pyrthei, u Myntri Rangbah ula ong ba ki dei ki Pulit kiba ai jingiada ia u bad kim shym la buh jingma ia u. Kila treibha ia ka kam.
“Kum u Myntri Rangbah barim ka Jylla u dei ban sngewthuh ia ka kamram jong ki Pulit, ka kam kaba ki leh, ka jingkloi ban pha iala ka jingim bad ka jingpynrem ia ki (Pulit) kam iahap satia” ong u Conrad.
U Myntri Rangbah ula kyntait ruh ban kynnoh ia ka jingbym lah treikam bha ki bor syntiat haba ong ba ka dei kaba suk ia ki briew ban kynnoh ia ka jingbym lah treikam bha ki bor syntiat. Ula ong ba ka don ka jingbymbiang bad un sa pyrshang ban pynbeit ia kane namar ka dei ka kam kaba jyrwit jyrwat bha.
Haba kylli la un khmih bniah biang halor ka jingai bor pahara ia u, u Conrad ula ong ba ula iakren bad u Director General of Police Dr LR Bishnoi bad ula pynpaw ia kane. Ula pyntip ba um pat iakren bniah satia ia kane hynrei kane ka dei ka kam kaban sa iaid hi dalade.
Pule ruh: Ioh pyllait ki Pulit ia u Khynnah ba shah rahbor hala u Kni na Nongpoh
