Shillong, Naitung 27 : U Symbud Myntri Rangbah ba khmih ia ka Tnad kam Pohiing (Police) Bah Prestone Tynsong ha ka sngi Palei, ula pyntip ba ki Pulit kila trei iala ka kam ban iohkem ia ki briew kiba sam ia ka shithi dawa pisa thok ha ka kyrteng jong ka kynhun Hynniewtrep National Liberation Council (HNLC).
Haba iakren bad ki nongthoh khubor, ula pyntip ba ki Pulit kin sa wad ruh la ka don kano kano ka jingthmu ban pynkut ia ka jingiakren iasuk hapdeng ka Sorkar Pdeng, ka Sorkar Jylla bad ka HNLC.
Ula pyntip ba shuwa ka jingiakren iasuk ba pura, dalade hi ula iakynduh ia ki Nongialam ka HNLC bad iakren halor kine ki ishu namar ha kine ki sngi ba mynta, ka dei kaba suk palat wat ban shna ia ka letterhead duplicate.
“Dang ha ki khyndiat bnai bala leit, katto katne ki briew kila ioh pdiang ia ka shithi dawa pisa. Nga la iakren bad ki (HNLC) bad ong ba phi dei ruh ban shimkhia bad leh eiei lada don ba pyndonkam ia ka letterhead ka seng khlem ka jingbit jong ki Nongialam. Ka HNLC kala mynjur ban leh ai kata” ong u Bah Prestone haba bynrap ba katto katne na ki Nongialam ka seng kila pynsahi paidbah dangshen ba kine ki shithi dawa pisa kim dei ba la ai da ka HNLC.
“Nga kmen bha ba haduh kane ka khyllipmat ba nga kren sha phi, ka HNLC kala shimkhia bha halor ka jingiakren iasuk” ula ong haba kular “Ki pulit kila leh iala ka kam ban wad ia ki briew kiba donkti bad ban lap ia kaei ka jingthmu jong ki, hato ka dei ne em ka jingthmu ban pynkut ia ka jingiakren iasuk hapdeng ka Sorkar India, ka Sorkar Jylla bad ka HNLC?”.
U Bah Prestone ula pyntip ruh ba kin sa dang don bun ki jingialang bad ka HNLC kum shibynta jong ka jingiakren iasuk bad ong “Nga thikna ba shen ngin sa lah ban iapynbeit bad poi sha ka jingiasuk”.
Haba kylli halor ka kyrwoh ka HNLC ba kyntu ia ki paidbah ban ai synniang sha ka seng, u Bah Prestone ula ong “Naba ka jingiakren iasuk kala iaid, ha nga shimet nga sngew ba baroh kiei kiei ki dei ban sangeh noh. Toh ngin iakren namar ka Sorkar Pdeng bad Sorkar Jylla ruh kila shimkhia bha bad ki kwah ban pyndep noh kham kloi ia ka jingiakren”.
“Ngi kwah ban kyrpad biang ia ki Nongialam ka HNLC sa shisien ba kin shimkhia bha” ula ong.
