Nongpoh, Naitung 26: Uwei u rangbah briew uba la don kumba 40 snem ei ei ka rta, hynne ka sngi Balang, u la duh noh ia la ka jingim hadien ka jingshah bat kynsan haka bording ilektrik na ka jingdkut jong u sainar bording ha ka surok ban leit na Umden sha Umshaken ha Ri Bhoi District.
Kane ka jingjia ka la jia ha ka por kumba 2 baje noh phai sngi, ha kaba ka don ka jingther u lapbah bad uwei u sainar ilektrik u la dkut noh ha surok bad utei u rangbah uba wan da ka motorbike u la tyngkhuh ia utei u sainar khem da iohi bad u la shah bat syndon ha ka bording ilektrik haduh ba u la duh syndon ia la ka jingim.
Kumba la ioh lum jingtip, la ong ba ha kane ka jingjia,ka met utei u rangbah ka la ingkhong khaid bad u la kyllon syndon ha madan na ka daw ka jingtrei borbah ka bordig ilektrik haduh ba u la duh syndon ia la ka jingim.
Une Rangbah uba la ngat ha katei ka apot shah bat ha ka bording ilektrik la tip kyteng kum u Bah Nevershon Nongkseh bala 40 snem ei ei.
Haba wad jingtip na u heh Pulit ka Ri Bhoi, u Giri Prasad, u la ong ba ka la don shisha kane ka jingjia kaba u rangbah u la shah bat ha ka bording ilektrik bad la phah ia ki bor pulit ban leit tohkit halor kane ka jingjia.
U pyntip ba ia ka met jong une u rangbah la wan kit noh sha Civil Hospitla Nongpoh ban pyndep ia ka post mortem.
