Shillong, Naitung 25: U Nongialam ka Trinamool Congress (TMC) Meghalaya u Dr. Mukul Sangma hynne ka sngi ula dawa naka sorkar ban thung daka kynhun tohkit laitluid halor ka jingshah kem u Youth President ka TMC Richard Marak halor ka huri hura ba mih hapdeng ka jingialang jong u Myntri Rangbah ka Jylla bad ki Senghalang bad ban tip mano ba aibor ban phah kem ia u.
Haba kren sha ki lad pathai khubor u Dr. Mukul ula ong ba ia kane ka kynhun tohkit dei ruh ban khmih daka ïing bishar ka Meghalaya High Court.
U Myntri Rangbah barim ka jylla u Dr. Mukul Sangma ula kynthoh tyngeh iaka tnat Pulit daka ba kynnoh ba ka tnat Pulit kala kylla long ka atiar jong ki sengsain pyrthei kiba don haka sorkar.
U Dr. Mukul ula ula buh jingkylli ruh ia ka rukom treikam ka tnat Pulit bad baka Tnad Pulit kala shah pyndonkam bakla naka bynta ka jingmyntoi kito kiba don haka bor bad dei namar kane ki paidbah ruh kila duh jingshaniah haki bor pyniaid.
“Ka tnat Pulit kadei kawei ka tnat kaba peit iaka bha ka biat haba iadei bad ka jingbishar hok. Mynta lada peit bniah iaka rukom treikam jong ki Pulit ka paw shai ba ka tnat Pulti ka shah ialam bakla ha kito ki nongialam sengsain pyrthei kiba don haka bor” la kynnoh u Dr. Mukul.
U Dr. Mukul ula kynnoh ba ka jingmih jingkulmar hadien ka jingialang hapdeng u Myntri Rangbah bad ki Sengbhalang ha Tura ka paw hi iaka jingtlot bor ka tnat Pulit.
“Kumno ki Pulit kim tip kaei ka ban jia hadien ka jingialang namar naduh ki sngi shwa ban sdang ka jingialang, ki jingkyrpad kila saphriang haki rynsan social media bad la kyntu ia baroh ki paidbah ka thain Garo Hills ba kin wan sha ka jingialang” ula ong.
Ula ong ba haka kyrteng jong ka Jaitbynriew, baroh kila wan ban ap iaka rai jong ka jingialang hynrei naka liang ki Pulit kim shym la pynkhreh ban tem ia kano kano ka jingjia ka ban mih na kane ka jingialang namar ka jingiakhih haka kyrteng Jaitbynriew ka long kaba pynshongshit iaki briew bad ka ba lah ruh ban wanrah ka jingiakynnad, lada kim paidbah ki hun iaka rai.
Nalor kane u Dr. Mukul ula kyntu iaki paidbah ba kin long kawei naka bynta ban wanrah ka shong suk shong shngan hapoh ka jylla bad ula pynpaw ba ka jingjia ha nongbah kan dei ka jingprat lynti ia baroh naduh ki Khasi, Jaintia bad Garo ban long kawei naka bynta ka jingmyntoi ka jylla bad baroh lang.
Pule lang ia kane: Thung ka Sorkar ia u Prof SM Sungoh kum u Chairperson ka State Education Commission
