Shillong Naitung 24: Ka Voice of the People Party (VPP) hynne ka sngi Nyngkong, kala dawa na ka sorkar jylla ba kan pynthikna ha ka ban ailad shwa ia ki riewlum ha ka jingthung kam kum ki Nongbishar ne Judge jong ka Meghalaya High Court.
Ha ka shithi kba la phah sha u Myntri Rangbah ka jylla Conrad K Sangma, u General Secretary ka VPP Dr Ricky AJ Syngkon ula ong “Ngi kyrpad jur ia phi ban tuklar mardor halor kane ka mat bad ban pynthikna ba ki trai riewlum ka jylla kiba don iaka jingnang jingstad bad kiba lah ban trei ha ka kam kaba ki don, ba dei ban ailad shwa ia ki ba kin pyndap ha ki kam kiba lait thylli.”
Kane ka jingphah shithi ka VPP, kadei hadien ba kala mih ka khubor ha kaba iadei bad ka jingthung ia u Biswadeep Bhattacharjee Additional Advocate General ka Meghalaya ban pyndap ia ka kyrdan Judge jongka Meghalaya High Court katkum ka jingbthah jongka Supreme Court of India.
“Kum ka seng, ngi kwah ban pynpaw ia ka jingsngew ha kaba iadei bad katei ka rukom thungkam kaba long kumba ym shim la suidniew satia ia ki trai riewlum ka jongka jylla” ong u Dr Syngkon.
Ula kdew ba kila don katto katne ki nongiasaid aiñ kiba la rangbah bad ih bha ha ka kam iasaid aiñ ha ka High Court bad ka jingstad bad jingshemphang ka jongki kadei kaba la tip da baroh ia ka jinglah ka jongki ban trei ia ka kam bad kidei ruh ki trai riewlum jong ka jylla.
Ha kawei pat ka liang ka VPP kala phah iaka dorkhas sha u Lamphang ka iingdorbar thawaiñ ka jylla u Thomas A Sangma bad pynpaw iaka jingbynniaw bad jingpyrshah ban pynlong iaka Annual Conference kaba 20 jongka CPA ha ka Sngi U Blei kaba dei ka sngi ban kaba bun ki paidbah ki leit ban mane Blei.
U Dr Syngkon ula ong ba ka jingbuh tarik na ka bynta katei ka prokram, ka long kum ka jingbym burom ia ka jingngeit bad iaka sngi mane jong ki Khristan kiba don ha ka jylla.
Ka VPP kala dawa ba dei ban pynkylla noh ia ka tarik jong katei ka prokram ban pynthikna ba ha ki sngi bad ki snem ban wan, ym dei ban pynlong ia kum ia kitei ki prokram ha ka Sngi U Blei.
