Nongpoh, Naitung 21: Ka Meghalaya Chess Association (MCA) ha ka sngi Thohdieng, ka la plie pyrda ia ka lympung 46th Meghalaya State Chess Championship kaba 2 sngi, ia kaba la pynlong ha ka shnong Umsning Ri Bhoi District bad la pyniaid da ka Ri Bhoi District Chess Association.
Ia kane ka lympung ialehkai Chess, la pynlong kyrpang da la MCA ha kylleng ki district jong ka jylla Meghalaya kum shibynta ban sei ia ki rang bad ki thei ialehkai kiba don sap ha kane ka kam ialehkai chess ban mihkhmat pat ia ka jylla sha ki lympung ialehkai kiban sa long shabar ka jylla National bad international level.
La plie pyrda ia kane ka lympung ialehkai da u Dr Celestine Lyngdoh, MLA ka Umsning Konstituensi ha ka jingiadonlang u Bah Rocky Marwein, u Bah K.M Warjri, President ka Meghalaya Chess Association, u Bah Frankie Nongrum President ka RBDCA, u Bah Rocky Kylla Chairman ka Umsning Town Dorbar lem bad kiwei kiwei.
Haba kren ha kane ka sngi, u Bah Celestine Lyngdoh, u la pynpaw ia ka jingkmen ba kum kine ki rynsan ialehkai chess kin wan hiar sha kane ka district namar ba kum ka district hi ka don ia ki samla kiba donsap ha kane ka kam ialehkai chess, da kaba ai jingiaroh ruh ia ki kynhun jong ka MCA bad RBDCA kiba phaikhmat sha Ri Bhoi District ban wanrah ia kane ka rynsan ialehkai sport.
U la ong ruh, ba watla ma u kum u nongmihkhmat paidbah, um don kano kano ka jingtip halor kane ka kam ialehkai chess, hynrei u don pat ka jingsngewthuh, ba kane ka kam ialehkai chess ka pynlong ia kito kiba shimbynta ban kham proh ka jabieng bad ka bor pyrkhat pyrdain. Ula ai ka jingkitbok kitrwiang ia baroh ki nongiashimbynta ba kin ioh ia ka nam jingjop bad ban paw bha ha kane ka kam ialehkai chess.
U Bah Frankie Nongrum, u la pynpaw ia ka jing sngewnguh ia ka MCA kaba la ailad ban pynlong ia kane ka lympung ha Ri Bhoi District khamtam ruh ia ka Directorate of School Education and Literacy ka sorkar Jylla kaba la ai jingiatreilang da kaba phah ia ki skul bapher bapher jong ka jylla naduh ki Upper Primary haduh ki Higher Secondary ba kin don noh ia ka Chess Club ha ki skul ki jong ki khnang ba ki khynnah skul kin ioh ia ka jinghikai ban ialehkai Chess.
Pule ruh: Pyntip u DC ban iakynduh u CM ia ki Sengbhalang ka Ri-lum Garo la 24 tarik ha Tura
 ha ka sngi Thohdieng, ka la plie pyrda ia ka lympung 46th Meghalaya State Chess Championship kaba 2 sngi, ia kaba la pynlong ha ka shnong Umsning Ri Bhoi District bad la pyniaid da ka Ri Bhoi District Chess Association.){kind=link}