Shillong Naitung 21: Ka Federation of Person with Disabilities, haka sngi Thohdieng, kala leit tynruh biang ia ka Sorkar Jylla ban pynkynmaw ia ka jingbym pat pyntreikam ia ki mat jingdawa kiba dei ki hok jong ki briew ba duna dkhot met kumba la pruid dak ha ka RPWD Act 2016.
Kane ka Seng bala ialam da u Chairman Bah Ferdinand L Marshillong, kila leit ban iakynduh ia u Myntri ka Tnad Social Welfare Bah Paul Lyngdoh bad aiti ia ka dorkhas kiba kdew ia ki mat kiba la dawa na ka por sha ka por hynrei kiba la pynsahteng da ka Sorkar ban pyntreikam.
Kat kum ka dorkhas, kane ka Seng ki briew ba duna dkhot met, kala pyntip ba ki don bun ki briew kiba duna dkhot met, kiba trei kum ki Muster Roll ha ki Tnad bapher bapher ka Sorkar bad kumta la kyrpad ia ka Sorkar ba kan thungkam pura noh ia ki hapoh ka kyrdan Group-D.
Kane ka Seng kala dawa ruh ia ka Sorkar ba kan pynlong iaka Special Recruitment Drive na ka bynta ki briew ba don jingduna ha ki dkhot met ha ki tnad sorkar haba don ki briew ba duna ha ki dkhot met ki iehnoh ia ka kam jongki.
Kala ong ruh ba katkum ka RPWD Act 2016 Chapter VI Section 33 (clause i-iii), la dawa ia ka Sorkar ba kan thung iwei I dkhot na kiba don jingduna ha ki dkhot met ha ka MPSC bad DSC ba kin peit na ka bynta ka jingthungkam ia kiba don jingduna ha ki dkhot met . kala dawa ruh b aka sorkar ba kadei ban ithuh ia ki kam kiba lait na ka bynta ki briew ba don jingduna dkhot met hashwa ban ai ka jingpynbna paidbah ha ka MPSC bad DSC.
Ka Federation ka dawa ruh ia ka sorkar ba kan bthah ia ki jaka pule jong ka sorkar bad ki jaka pule kiba ioh jingiarap na ka sorkar ba kin pyntreikam ia ka jingbhah 5% ka seat na ka bynta ki briew ba don jingduna ha ki dkhot met kumba la kdew ha ka RPWD Act 2016 Chapter VI Section 32.
Ha ka dorkhas, ka Federation kala dawa na ka sorkar ban buh ruh ia ki Sign Language Interpreter ha baroh ki jingialang, prokram jong ka sorkar bad pynbiang iaki Information and Communication Technology kumba la kdew ha ka RPWD Act 2016 Chapter II bad VIII bad ban ban thung ia 3 ngut ki Special Educator ban ai jingbatai haka HI,VI bad MR ha man la ki C&RD Block jong ka jylla ban pynthikna ba ki khynnah kiba donkam iaka jingiarap kaba kyrpang kin ym duh ia ka hok kumba la kdew ha ka RPWD Act 2016 Chapter III.
Pule ruh: Pat rai ka HSPDP ban sei kyrtong sha ka elekshon MP-Lok Sabha
