Shillong Naitung 21: U Myntri Rangbah ka jylla u Conrad K Sangma hynne ka sngi Thohdieng ula sam iaka Appointment Letter ne ka shithi thungkam sha ki 1010 ngut ki samla kynthei bad shynrang kiba la ioh rung ha ka kam pulit ha ki kyrdan bapher.
U Conrad ula sam ia kitei ki shithi thungkam ha ka jingialang kaba la long ha Shillong International Centre for Performing Arts and Culture ne SICPAC kaba don ha Mawdiangdiang, ha ka jingdonlang u Symbud Myntri Rangbah ka jylla uba khmih iaka tnad Kam Pohiing u Bah Prestone Tynsong, u Chief Secretary ka jylla u Bah D.P Wahlang, u Director General of Police ka jylla u Dr. L. R. Bishnoi bad kiwei kiwei ki heh pulit ka jylla.
Haba kren ha ka jingialang u Conrad K. Sangma, ula ai khublei ia kine ki samla kila la iohkam bad ula kitbok iaki ba kin lah ban trei bad ai ka jingshakri ha ka kam kaba ki trei na ka bynta ban iada ia ki nongshong shnong ka jylla bad ban pynneh iaka shongsuk shongshngain.
Ula ong, ba ka sorkar jylla kala shim ia ki sienjam ban pynkhlain iaka tnad pulit da kaba thung ia u Commissioner ha ki district bad ban pynrungkam sa ha ki 2000 tylli ki kyrdan bapher bapher.
U Conrad ula ong, ba ka sorkar kan pynbit pynbiang da kaba buh ia ki kor ki bor ban pynkhlain iaka tnad pulit bad la rai ruh ban thied ia ki kali thymmai naka bynta ki police station bad police outpost kiba don ha kylleng ki jaka khnang ba kin lah ban beh mardor haba don kino kino ki jingjia.
“Ngi don pyniaid shakhmat iaka jingthmu ban don iaka Engineering Wing ha ka tnad pulit ha kaba u Superintendent of Police (SP) yn long kum u Chairman. Kane kadei da ka jingthmu ban shimkhia ia kiba bun ki jingdawa na ka bynta tei ia ki jingdonkam bad ynsa bhah tyngka ruh kham bun na ka bynta ban shna pynbha ia kijingtei bapher jong ki pulit” ong u Myntri Rangbah.
Ula ong ruh, bun ki jingkylla ki dang don ha ka lynti, kynthup iaka jingthaw iaka Directorate of Forensics, ban pynkhlain shuh shuh ia ki bor kiba dei khmih. Ngi ngeit skhem ba kine ki sienjam kin iarap shibun ha kaban kyntiew ha baroh ki liang ia ki pulit ha kaban shakri ia ka jylla.
Kine ki samla kiba la shah thungkam kidei kiba la ialeh iaka eksamin ia kaba la iashimbynta da 1.5 lak ngut ki samla ka jylla bad kane kadei ka sien kaba nyngkong ba ka tnad pulit kan pynlong iaka jingialang ban sam ia ki shithi thungkam sha baroh kine ki samla kiba la iohkam pulit.
Pule ruh: Pyrshah jur ka MCTA ba rai pyntreikam kyrkieh ka NEHU ia ka NEP-2020
