Shillong, Naitung 19 : Ka Iingkashari Meghalaya High Court ha ka sngi Balang, kala ong ba ka Meghalaya Waterbodies (Preservation and Conservation) Guidelines, 2023, ka dei kaba la shu leh tang dep rukom namar ka jingklet ia ka mat ba kongsan eh kiba iadei bad ki jingmih ki Iing bad ki jingtei harud jong ki Wah hapoh ka Jylla.
Haba shong bishar ia ka PIL halor ka jingkhuid jong ka pung Umiam, ka Division Bench kala ong baka Meghalaya Waterbodies (Preservation and Conservation) Guidelines, 2023, kam shym la kren eiei bad ka mat ba kongsan bha halor ka jingmih ki iing bad ki jingtei ba kum ki tit harud jong ki Wah.
Ka la ong ba ka kyndon (guideline) kala pynpaw ba ia ki jaboh, jabain bad ki lyngkhot lyngkhai lah ban nym bret shapoh ki wah hynrei kaba lyngngoh pat ba long ba ia ka kyndon la pynmih khlem da kdew pat ba haduh katno ka jingjngai n aka rud jong ki Wah ba lah ban tei jingtei.
“Haba lyngkot hi, ka kyndon jong u snem 2023 bala pynmih da ka Jylla ka paw ba ka dei tang ka jingleh rukom khlem da kren eiei ia ka mat ba kongsan bha. Ka Jylla kan hap leh kham bha ia kane” ong ka Iingkashari haba bthah ia ka Jylla ban ai shuh shuh ia ka kaiphod hapoh ka hynriew taiew.
Kala bthah ruh ba ka jingkhang ban pyntrei ia ki jingtei harud ki wah kan dang iai bteng tad haduh b aka Jylla kala lah ban leh eiei halor kane ka kam da kaba wanrah ia ki kyndon kiba kham janai.
Ka Iingkashari ka pynpaw ba ha ki hukum bala pynmih teng kala paw ba ka Jylla kala thaw ia ka Expert Committee. Katto katne na ki jingai jingmut jong ka Expert Committee la pynpaw ha ka affidavit bala ai da ka Jylla hynrei kam shym la shai pat ba haduh katno kine ki jingai jingmut ki dei kiba shong ain.
Kala pynpaw ruh ba ka Jylla kam shym la shim ruh ia ki jingai jingmut ban pynthikna ba ka sawdong sawkun harud jong ki Wah kin ym shah pynjot ha ka kyrteng ban kyntiew ia ki kam jngohkai lane ban tei jingtei.
“Ki kyndon bala wanrah da ka Jylla kumba la pynpaw ha ka affidavit kam shym long kat kum ka jingkhmih lynti lane ki sienjam ba donkam ban shim ha kaban iada ia ki wah khamtam ka pung Umiam” ong ka Iingkashari.
Ka Iingkashari kala ong ruh b aka Jylla kan hap pynpaw ia ki sienjam ba kala shim ha kaban tehlakam ia ka jingpom pathar ia ki dieng naba la paw ba ka jingpom ia ki dieng bad ka jingmait ia ki lum kala iaid ha shilynter jong ki Highway hapoh ka Jylla na ka bynta ban tei jingtei.
“Watla, ka Sorkar, kala kam teng ba ka Jylla ka don palat 75 % ki khlaw hynrei kan sngewtynnad shibun ban pynthikna la kala don ne em ka jingsorjamin ba dang shen halor kane ka kam bad ia ka kaiphod ban wanrah hakhmat ka Iingkashari” kala ong.
Ka Iingkashari ka ong ruh, namar ka jingbym don kino kino ki lad iohkam iohjam bad ha ka kyrteng ban kyntiew ia ki kam jngohkai, ym dei ban pynjulor ia ka jingitynnad ka mariang jong ka Jylla bad b aka Jylla ka dei ban leh eiei halor kane ka jingeh.
