Shillong, Naitung 16 : Ki Nongialam ka Achik Conscious Holistically Integrated Krima (ACHIK) bad Garo State Movement Committee (GSMC) – Laben Ch Marak bad Balkarin Ch Marak, kila rai ban pynbteng ia ka jingshah jingit tad haduh ba u Myntri Rangbah ka Jylla Conrad K Sangma, ula khot ia ki ban iakren halor ka jingdawa pyntreikam ia ka backlog policy bad winter capital ha Tura.
Ha ka kyrwoh ba pyllait hynne ka sngi U Blei, u Laben uba dei u Ophisar barim ka Sorkar bad Nong ialam ka ACHIK ula ong ba ma u lem bad u Balkarin, Co-Chairman ka GSMC kin pynbteng beit ia ka jingshah jingit tad haduh ba u Myntri Rangbah ula khot iakren halor ki jingdawa.
Kine baroh arngut kila kynnoh ia ka 6 sngi ha ka jingshah jingit bad kam pat shym la don satia kano kano ka jingaiktien na ka Sorkar ne ka kynhun ki Doktor ban peitthuh ia ka koit ka khiah jongkine ki arngut.
Une u Nongialam ka ACHOK kila pyntip ba ka jingwan iashimbynta lang jong ki paidbah kala nang bun katba nang iaid ki sngi bad pynbna ruh ba ma u lem bad u Balkarin kin nym mynjur ia ka em kum ka jubab.
Ula ong ba ka koit ka khiah u Balkarin kala nang troin hynrei ula iengskhem ban iakhih haduh da jaw lut ka snam na ka bynta ban pynioh ia ka hok bad ka bhah jong ki Garo.
U Laben ula ong ba ki kyrmen ba ka Sorkar kan sa pynsngap lem iala ki skhor ia kine ki jingdawa kiba la sahteg jong ki paidbah ka Ri-lum Garo.
