Shillong, Naitung 11 : U Superintendent of Police ka East Khasi Hills Bah Sylvester Nongtnger hynne ka sngi Ba-ar, ula pyntip ba ki Pulit kin dang ban chargesheet ia ki briew kiba la kem halor ka huri hura bad ka jingthang kali ha phyllaw ka Laitumkhrah Police Station.
“Kane ka kam ka dang iaid ha ka jingtohkit mynta bad ngim pat file ia ka chargesheet hynrei u Investigating Officer (IO) u dang leh ia ka kamram” ong u Bah Nongtnger haba iakren bad ki nongthoh khubor.
Ha ka 8 tarik, san ngut ki briew kiba dei naki arkynhun mamla kila shah kem halor ka jingiashoh iadat kaba lam sha ka jingshah wiang ding lai tylli ki kali ha Laitumkhrah Police Station.
Ia kine ki san ngut la ialam tian bishar hakhmat ka IIngkashari kaba la phah sha ka jingtohkit ba 5 sngi ha ka Police custody.
Haba kylli la kan dang don ka jingkem briew, u SP ula ong “Kane kan sa wan ynda la dei ka por. Ngam lah ban iathuh ia phi. Ngam lah ban batai lypa hynrei u IO u dang leh ia ka kam”.
Ha ka sngi Palei, kala mih ka jingiashoh iadat hapdeng arkynhun mamla bad kane ka jingwiang ding ia ki kali kala jia haba kine ki ar kynhun kila iakynduh biang ha Laitumkhrah Police Station ban ia ujor ejahar.
Katba ki ar kynhun ki dang iania hapoh Thanad, katto katne ngut ki briew kiba ialum shabar, kila wiang ding ia kawei ka gypsy ki pulit, kawei ka tourist taxi bad kawei ka thuk thuk kiba pynieng hapoh thanad.
Kine ki briew kila lun maw ruh ia ka thanad bad pynjulor ia ki jingkhangiit.
