Shillong, Naitung 09: Ka Lehniam Behdeinkhlam kaba ju long shisien shi snem kala kut noh hynne ka Sngi u Blei ha kaba da ki hajar ngut ki paidbah kila wan ban sakhi ia kane ka shad tynrai kaba la pynlong da ka Sein Raij Jowai, ha Aitnar, Jowai.
Ka Behdienkhlam kadei kawei napdeng ka lehniam lehrukom tynrai kaba heh tam jong ki Pnar ha Meghalaya bad ka Behdienkhlam ka mut ban beh ia ka khlam jingpang bad la pynlong iaka Behdienkhlam hadien ba la dep ban thung kba bad kadei ruh ka shad kaba kongsan tam jong ki riewlum Jaintia.
Ha kane ka shad la sakhi ba la ki khun ka Sein Raij kila shna kyrpang ia ki 12 tylli ki Rot ha ka jaka shad kiba don iala ki jong ki khubor bad ki jingkit jingmut ha kaba iadei bad ka juk ki kor teknoloji, ka jingpynneh pynsah iaka mariang, ka jingjyllei u Drug bad kiwei kiwei.
Hynrei kaba kham shongshit bha kadei ka jingwanrah ia u Symbud Khnong bad Khnong Blai, ha kaba baroh ki leit ban ktah ia kine ki khnong kaba long kum ka dak ba kin ioh iaka jingiada na kino kino ki khlam jingpang bad ba kin kiew irat ha ka jingim ka jong ki.
Ha kane ka jingrakhe mynta u snem la wan ban sakhi da u Lat ka jylla u Phagu Chauhan, u Chief Justice ka Meghalaya High Court u Sanjib Benerjee, u Myntri sorkar ka jylla u Bah Kyrmen Shylla, ki MLA, MDC bad kiwei kiwei.
Ha kane ka sngi Kut, ki paidbah na kylleng ki leit ban ialum ha Aitnar ha kaba ki samla bad ki rangbah ki shad da kaba bud ryntih ia ki jingsawa jong ka ksing bad tangmuri bad ha kane ka Shad ki kynthei kim ju iashimbynta.
Ha kine ki 3 sngi jong ka lehniam Behdienkhlam, ia ka niam ka rukom la leh da u Daloi katba ki samla shynrang ki iashimbynta ha ka lehniam lehrukom da kaba leit rung ha ki ïing ki sem ban beh iaka khlam, ki jingpang bad iaka sniew ka smeh da kaba tied ia ki tyrsad ïing da ki siej.
Hadien ba la dep pynlong ia katei ka shad tynrai, la pynbud pat iaka ‘datlawakor,’ kaba iasyriem kum ka jingiakynjat Football, hynrei ki riewngeit ki iakynjat iaka bol dieng bad ka kynhun kaba jop ia kane ka jingiakhun la ngeit ba kan ioh iaka jingkyrkhu khyrdoh ba ka rep ka riang kan longkaba seisoh bha.
