Agartala, Naitung 07 : U Lamphang ka Iingdorbar Thaw Ain ka Tripura Biswa Bandhu Sen hynne ka sngi Thohdieng, ula sospon shisngi ia 5 ngut ki MLA ka Liang Pyrshah namar ka jingpynthut ia ki jingiakren hapoh ka Iingdorbar hynne ka sngi sdang jong ka Dorbar Mang tyngka.
Hadien kane, baroh ki MLA kiba dei jong ka Tipra Motha Party (TMP), CPI (M) bad ka Congress- kila iamih paidbah na ka Iingdorbar ban pyrshah ia ka rai jong u Lamphang haba dawa ruh ba dei ban leh eiei pyrshah ia u MLA ka BJP Jadab Lal Debnath, uba la ioh ring video ba u dang peit phlim khlemakor ha ka mobile jong u katba ka dorbar jong ka IIngdorbar ka dang long ha u bnai Lber.
Kane ka jingkulmar kala sdang mar syn sdang hi ka Dorbar ha ka por ba u Myntri ka Tnad Pla Tyngka Pranajit Singha Roy, u dang wanrah ia ka mang tyngka u snem 2023-2024.
Baroh ki MLA ka TMP, CPI-M bad Congress bala ialam da ki Nongialam jong ki, kila iahiar sha ka pung jong ka IIng bad sdang iahylla haba dawa ban leh eiei pyrshah ia u Debnath bad kane ka jingiahylla kala bteng ia palat 40 minit hashuwa ba u Myntri Rangbah ka Jylla Manik Saha ula jer kyrteng ia ki 5 ngut ki MLA ban sospon shuwa ia shisngi.
U Lamphang ruh mar mar ula pynbna ia ka jingsospon ia kine ki 5 ngut ki MLA kiba kynthup ia u Sudip Roy Barman (Congress), Nayan Sarrkar (CPI-M),u Brishaketu Debbarma, Nandita Reang bad Ranjit Debbarma kiba dei jong ka Ula bthah ruh ia ki watch and ward staff ba ki pynmih noh ia ki shabar jong ka Iingdorbar.
Hapdeng kane ka jingkulmar, ki laingut ki MLA ka TMP kum shibynta ban pyrshah, kila kiew halor ka mieh jong ka IIngdorbar ban hylla pyrshah ia u Lamphang.
Namar ka jingiai bteng ka jingiahylla kyrkaw, u Lamphang ula ong ia ki MLA ka Liang Pyrshah ba u lah ban pyrkhat pat ia ka rai ban sospon ia ki MLA, kaba la pynlong ia kiwei ki MLA ban leit phai shala ki jong ki shuki bad hadien kila iamih paidbah noh na ka Iingdorbar.
Hadien ba baroh ki MLA ka Liang Pyrshah kila mih napoh ka Iing, u Myntri pla tyngka ula bteng ban pule ia ka mang tyngka.
Hashuwa kane, shuwa ban sdang ka Dorbar, u Nongialam ka Liang Pyrshah Animesh Debbarma ula wanrah ia ka adjournment motion ban iakren halor ka kam u Debnath hynrei u Lamphang ula kyntait ia ka motion kaba la pynlong ia kine ki MLA ban ieng pyrshah.
U MLA ka Congress Sudip Roy Barman hadien ba rung shapoh ka Iing, ula synreit ia ka um Ganga ha ka miet bad ka madan jong ka Iingdorbar kum ka dak ban saitkhuid ia ka Iingdorbar.
Lah ban pynkynmaw ba ia u Debnath la lap ba ula peit ia ka phlim khemakor ha ka por ba dang long ka dorbar, kaba la saphriang ruh ha ki rynsan social media bapher bapher bad pynmih ia ki jingkynthoh ba bun jait na baroh ki liang.
Une u Nongialam ka BJP bala 55 snem, ula iathuh ba dei ha ka por ba u shim ia ka phone ba don ba phone ia u, ba kane ka website phlim khlemakor kala shu mih bad plie hi bad mar mar ruh ula pynlip noh ia ka.
Pule lang ia kane: Leit jngoh u Conrad ia ka jaka rep jingthung sma iwbih ha shnong Byrwa
