Shillong, July 6: Ka Laitkor SC bad ka PFR Football Academy kila ioh rung sha ka semifinal na ka Group A ha ka Shillong Sports Association’s Women’s League hadien ba kila jop ha ki jingiakhun kiba la long hynne ka sngi Palei ha Third Ground, Polo.
Ka PFR kala pynrem iaka Kick Start Football Coaching Centre da 2-0 katba ka Laitkor kala pynrem da 6-0 iaka Lawei Smit SC.
Halor kane ka jingjop ka Laitkor bad PFR kila ioh mar 12 point na ki 4 tylli ki jingiakhun hynrei ka Laitkor kala wan shakhmat namar ka jingbun ha ka jingioh ban thep kol bad kine ki ar tylli ki kynhun kila ioh rung sha ka semi final.
Ka Ridalin Suting kala thep kol ha ka minit kaba 22 bad ka Elviorika Sohkhlet kala thep iaka kol haka 27 minit na ka bynta ka PFR watla ka Kick Startkala pyrshang bad ialehkai tyngeh ban ioh thep kol hynrei kam shym la lah satia ban ioh thep kol ha baroh 3 tylli ki jingiakhun ki jongka.
Hadien kane, ka Nisilia Majaw kala ioh thep iaka hat trick ha ka minit kaba 3, 20, bad 46 minit na ka bynta ka Laitkor.
Ka Iaraplang Nongrum kala ioh thep iaka kol ha ka minit kaba 7, ka Iawanlang Nongbet ha ka minit kaba 36 bad ka Solina Jaba kala thep kol ha ka minit kaba 56 naka bynta ka Laitkor.
Ka jingialehkai lashai ka sngi ha ka Group B kan long hapdeng ka Synroplang 77 pyrshah iaka Lumparing SC ha ka por 2:30 mynsngi bad hadien kane ha ka por 4:15 mynsngi kan don sa ka jingiakhun hapdeng ka Maw U-Tieng pyrshah iaka Mawlai SC.
Pule ruh: Thaw ka Seng ki Longkmie ia ka Football Academy ban kyntiew ia ka sap ki Khynnah ialehkai
