Shillong, Naitung 06 : U Myntri Rangbah ka Jylla Conrad K Sangma hynne ka sngi Palei ula ong ba satang ynda ka Jylla kala lah ban pynmih bording na ki tyllong bapher bapher, kan long kaba shitom ia ka Jylla ba kan lah ha kaban sam ia ka bording ka bym don jingthut ha ki snem ban wan.
Haba iakren bad ki nongthoh khubor, u Conrad ula iathuh ba ka Jylla ka donkam kumba 1700 million unit ka bording man la u snem ha kaba ka Jylla nalade ka lah ban pynmih tang 1000 haduh 1100 million unit shisnem, kaba pyni ia ka jingduna kumba 600 haduh 700 million unit.
Ula ong ba ha ka jingshisha, ia kane ka jingduna la ju pyndap na ka bhah ba ka Jylla ka ioh na ki Central Agency bad kaba tam ka hap ban thied na ki Iew. Namar kata, kane ka dei ka jinglong jingman ba ngi iatakhuh mynta. Ula ong ba kumba 30% eiei ka don ka jingduna ha ka jingdonkam ia ka bording hynrei kane ka dei kawei pat ka bynta.
“Ka bynta kaba ar jong ka jingeh ba ngi iatakhuh ka dei namar baroh ki kam pynmih bording ki dei lyngba ki Hydro project bad haba ka um ka duna, kane ka ktah ia baroh ki Unit kynthup ia ki Central Unit ruh kumjuh. Namar kata, katba ngim pat lah ban pynmih bording na ki tyllong bapher bapher, ka long kaba eh ban ai ia ka bording ba khlem ka jingthut hadien habud” ula ong.
Haba pynpaw ba ka dei ka jingeh ba jyrwit jyrwat bha, u Conrad ula ong “Hynrei ngi la trei ia ka kam bad nga la ai katto katne ki buit halor ki rai ba eh ba ngi donkam ban shim bad ngi la shong pyrkhat ia ki bad ngi la sdang ruh ia ki kam ban phaikhmat sha ka jingpynmih bording na ka sngi”.
“Ka jingpynmih bording na ka sngi kam dei kaba lait na ki jingthut namar ka shong ha ka jingioh sngi. Namar kata, ngi hap ban khmih ia baroh kine kiei kiei bad ngi kyrmen ba ngin sa lah suki pa suki ban ioh ia ki lad ki lynti ha ka ban weng noh ia kine ki jingeh jong ka Jylla” ula bynrap.
