Shillong, Naitung 05 : Ka Sorkar Jylla kala pyllait ia ka pisa ba T. 12.44 klur kum ka instalment ba nyngkong ban siew ia ka arrear salary ba sahteng jong ki Nonghikai SSA jong u snam mang tyngka 2016-2017.
Ia ka tulop ba pynsahteng jong une u snem mang tyngka kaba dei jong u bnai Iaiong bad Jymmang ruh yn sa pyllait noh hapoh ka taiew ban wan.
“Hynnin ka sngi, u Myntri kam pule puthi Rakkam A Sangma ula pyntip ia ka Association ba ka Tnad Finance ka Jylla kala pyllait T. 12.44 klur kum ka instalment ba nyngkong ban siew ia ka arrear salary jong u snem 2016-2017 sha ki Nonghikai SSA” ong u Bah Aristotle C Rymbai, President ka Meghalaya SSA School Association (MSSASA) ha ka kyrwoh bala phah lyngba ka video sha ki lad pathai khubor.
Ula ong ba u Myntri ula kular ba ka Tnad kan sap hah ia ka santion order sha baroh ki District ba kin phah noh ia ka pisa sha ki Accoint jong ki Nonghikai SSA hapoh ka sngi Nyngkong ban wan.
“U ( Rakkam) la kular ruh ba ka tnad pule puthi kan sa pyllait noh ia ka tulop jong u bnai Iaiong bad Jymmang hapoh ka taiew ban wan bad ia ka shibnai ba sah kata jong u Jylliew, ka tnad kan sa pyllait kham hadien” ula bynrap.
Kat kum ka jingong jong u, ka Sorkar Jylla kan sa pyllait ruh ia ka song pisa kaba dei naka bynta ban siew ia ka tulop ki Nonghikai hapoh ka sngi nyngkong ban wan.
Pule ruh: Iakynduh u Conrad ia u Rijiju, iasyllok halor ki kam pynroi bad ka bha ka miat ki paidbah
