Shillong, Naitung 04: Ka Mawlai SC kala pynliem iaka Synroplang 77 da 14-0 haka jingiakhun ha ka Group B jongka Shillong Sports Association’s Women’s League kaba la long hynne ka sngi Baar ha Third Ground, Polo.
Hadien kane ka jingiakhun, ka Lumparing SC kala pynrem iaka Maw U-tieng SC da 2-0 ha ka jingiakhun ha ka Group B.
Ka Mawlai bad ka Lumparing kila ia jop mar 3 sien hynrei ka Mawlai kala jam shakhmat namar ka jingioh bun ha kaban thep kol.
Ka Lumparing kala ioh ban thep iaka kol ha shwa ban kut noh ka kylla step kata haka minit kaba 35 +1 lyngba ka Chibasal Sangma bad ha ka moinit kaba 49 ka Sangma kala ioh ban thep biang ia ka kol kaba ar ban pynthikna ba ka Lumparing kan ioh ia ka nam jop ha kane ka jingiakhun.
Ha shwa kane, ka Mawlai kala pynliem iaka Synroplang da kaba thep haduh 14 kol ha kaba ka Baiarkynti Mylliemngap kala ioh ia ka hat trick da kaba thep ia ka kol ha ka minit kaba 3, 18 bad 54, ka Makrisha Songthiang kala ioh thep 4 kol kata haka minit kaba 34, 39, 61 bad 63 bad ka Charlinda Nongtdu kala ioh thep kol ha ka 58, 67 bad 70+1 minit. Ka Cynthia Mylliemumlong kala ioh thep kol ha ka minit kaba 24 bad 26 minit katba ka Dakini Shylla kala thep kol haka 35 minit bad ka Marbarin Nongrum kala thep kol haka minit kaba 70+2.
Lashai ka sngi ka jingiakhun haka Group B, kan long hapdeng ka Kharang SC pyrshah iaka Iasnohktilang FC ha ka por 2:30 mynsngi bad hadien kane ka jingiakhun ha ka Group A kan long hapdeng ka Umpling SC pyrshah iaka Mawkriah West SC ha ka por 4:15 mynsngi.
