Shillong Naitung 03: U Myntri Rangbah ka jylla Conrad K Sangma un hiar sha Delhi ban iakynduh ia u Myntri ka sorkar Pdeng ka tnad pule puthi ban iakren halor ka jingeh kaba ki samla pule kila mad na ka jingbym ioh ban ialeh ia ka eksamin CUET bad ban wad ia ki lad ki lynti ban pynioh bun tylli ki Center ha ka jylla.
Ia u Myntri Rangbah ka Jylla yn synran da u Myntri ka Tnad Pule Puthi Rakkam A Sangma bad ki Ophisar ka jylla.
“Ngin leit iakynduh ia u Myntri ka Sorkar pdeng ban halor ka mat CUET bad ban pynioh bun tylli ki centre ha ka jylla bad ngin iakren ruh halor ka jingbym iohlad ki samla ban ialeh iaka eksam khnang ba kin ioh ban leh biang ia katei ka eksam” ong u Conrad Sangma.
Ula ong ba katei ka jingleit Delhi kan dei halor ka CUET bad nalor kane yn sa pynsngew ruh ha u Myntri ka sorkar pdeng ia kiwei kiwei ki mat ruh kiba iadei bad ka pule puthi.
U Myntri Rangbah ula iathuh yn leit iakynduh ruh ia u Chairman ka NTPC ha kaba iadei bad ki kam pynmih bording elektrik ha ka jylla nalor ka jingiakynduh ia ki heh jongka International Solar Mission ban tyrwa iatreilang na ka bynta ka CM Solar Mission ha ka jylla.
Nalor kane, u Conrad ula pyntip ba un sa leit ruh ia u Myntri ka sorkar pdeng u Piyush Goyal ban iakren na ka bynta ban buh ia ka Unity Mall bad ula phah jingthoh ruh ban iakynduh ia u Defence Minister na ka bynta ban iakren ha kaba iadei bad ki jaka jong ka tnad Cantonment Board khnang ba kin aiti iaki jaka sha ka sorkar jylla.
Pule ruh: Dawa ka KSU ia ka NEIAH ban wengkam noh ia ka briew ba shu wan ialam na UP
