Ujor ka FKJGP ia ka rukom shna jingkieng ha Nonbah ba tieng ioh kylla Dwar Ksuid

Nongstoin, Jylliew 28 : Ka Federation of Khasi Jaintia & Garo People (FKJGP)-Nongstoin Circle, kala leit ban ujor pyrshah ia ka rukom shna ia ka jingkieng sha ka surok National Highway kaba don ha Nonbah, Nongstoin namar ka jingsheptieng ioh ka kylla long sa kawei ka jingkieng jong ka surok Shillong By-Pass kaba don ha Dwar Ksuid.

Ka FKJGP Nongstoin Circle bala synran lang da u President ka FKJGP-West Khasi Hills Bah Chandra Nongdhar, kila leit ban iakynduh markhmat ia u Executive Engineer ka PWD, Nongstoin ban ujor ia ka kane jingkieng namar ka jingima ha ka rukom shna, kaba lah ban buh jingma pynban ia ki paid nongleit nongwan lashai lashisngi.

Kane ka jingkieng ka dei kaba pyniasoh ia ka surok ban rung sha sor Nongstoin bad ka surok National Highway.

Kane ka jingujor kala mih hadien ka jingshem na ka jingleit jurip ba ia kane ka jingkieng la shna da kaba kyntur sha ka wah ka ban pynthut ne pynrit ia ka lynti iaid jong ka Wah khamtam ha ka por lyiur ba kiew um kane ka wah, kaba lah ban ktah bad wanrah jingmynsaw pat ia u paidbah ha ka leit ka wan.

Ka jingsheptieng ka long ba ioh kane ka jingkieng kam lah kyrda ia ka bor jong ka Umsaw jong kane ka Wah ha ka por lyiur, kaba lah ban khlong ia ka khyndew ban pynlong lynti iaid bad pynshong synjor noh ia ka jingtei baroh.

Ka FKJGP ka sheptieng ba ioh kane ka jingkieng ka kylla long kum ka jingkieng jong ka surok Shillong By-Pass kaba la shong synjor tang katto katne snem namar ka jingkhlong lynti ka wah Umiam.

Ha ka jingiakynduh ia u Engineer, la iathuh ba une u Heh Sorkar ula pynpaw ba ka tnad PWD kam lah leh eiei satia halor kane ka jingpynsngew ka seng namar ia kane ka jingkieng la pyntrei da ka National High Authority of India (NHAI).

Halor kane, ka Seng kala rai ban sa leit iakynduh ia ki bor khmih ka NHAI ban dawa ba kadei ban pynbeit ne design thymmai biang ia kane ka jingkieng khnang ba kan long kaba shngain ia ka leit ka wan u paidbah.