Ampareen : Hap khang biang ban wanrah dohkha nabar Jylla lada shem ba dang khleh formalin

Shillong Jylliew 27: Ka Sorkar Jylla ka lah ban pynjari biang iaka hukum ba khang ban wanrah ia ki dohkha kiba nabar ka jylla, lada shem ba ka don ka jingai biang iaka dawai Formalin ha ki dohkha.

Ia katei la iathuh da ka Myntri ka tnad ka koit ka khiah ka Kong Ampareen hynne ka sngi Baar haba iakren bad ki nongthoh khubor.

“Lada lashai ngi leh ia ki Test bad ngi shem ba ka jur bha ka jingai iaka dawai Formalin ha ki dohkha, kumta sa shisien ngin hap ban pynjari biang ia ka hukum ba khang ban wanrah ia ki dohkha nabar ka jylla” ong ka Kong Ampareen.

Kane ka jingkren ka jong ka, ka la mih hadien ba ka sorkar jylla ha ka 24 tarik mynta u bnai, kala weng noh iaka jingmana kaba khang pyrshah ban wanrah ia ki dohkha nabar ka jylla.

Kala ong, ba nangne shakhmat yn bteng iaka jingleh test ia ki dohkha kiba wanrah na shabar ka jylla.

Kane ka Myntri Sorkar kala iada ruh halor ka jingkylli la kala don ka jingbym ia pyntip eiei hapdeng ka tnad Food Safety bad u Myntri Rangbah ka jylla.

Ha ka Lah Sngi U Blei, u Myntri Rangbah ula ong ba ka sorkar kan bteng ban khmih bniah ia katei ka jingjia hashwa ban weng noh iaka jingpynjari iaka jingmana ban khang wanarah ia ki dohkha kiba nabar ka jylla, watla ia katei ka jingmana la dep ban weng noh ha ka 24 tarik u Jylliew.

“U Myntri Rangbah ula jubab ia ka jingkylli jong ki nongpathai khubor ia kaei ka jingsngew jong ka sorkar jylla halor katei ka kam bad ka jingkren u Myntri Rangbah ka long kaba shai ba ka jingmana ban khang kan iai bteng lada la shem biang ba ka donka jingai iaka Formalin ha ki dohkha la ka long khyndiat ne shibun namar ka Formalin ka dei ka bym long ban pyndonkam. Kumta u Myntri Rangbah ula ong, ba lada lashai la lap ba la leh biang ha ka jingleh test da ka tnad Safety kumta yn hap ban weng mardor ia kitei ki dohkha” ong ka Kong Ampareen.

Ka Myntri ka koit ka khiah kala iathuh ba kala ioh ban iakren bad ki nongkhaii bad nongdie dohkha bad kila pyntip ba kila ioh ia ka syrnod naka sorkar Karnataka.

“Haei katei ka jingai dawai ia ki dohkha kala jia bad phi hap ban tip kum ki nongdie dohkha. Lada nga wanrah eiei hapoh iew bad nga die ha phi, nga hap ban pynthikna ba kadei ban don ka jingshim ia ki lad kiba shngain” ong ka Myntri Sorkar bad ka bynrap “Ki kyndon jong ka jingpynkhein ia ka Food Safety yn hap ban pyntreikam”.

Kala iathuh ruh ba la bthah ia ki Food Safety Inspector ba kin wad katno sngi ka shim por ban pynpoi ia ki dohkha na kiwei pat ki jylla shapoh ka jylla Meghalaya.

“Nga lah kylli na ki (Nongkhaii bad nongdie dohka) ba katno sngi kan shim por ia ki trok kiba mih na Karnataka ban pynpoi ia ki dohkha sha Shillong. Nga lah ong ia ki ba kan shim por kumba 15 sngi hynrei kila pynshai ba ka shim por tang 4 sngi. Kane kadei kaei kaei kaba ngan tip bniah bha, kumta ki Food Safety Inspector kidei kiba biang tam ban leh ia katei” ong ka Kong Ampareen.

Kala ong ba ka sorkar kala bthah ia ki ba kin shimkhia thikna ia kane ka kam bad ban kin leh ia kaba donkam ha ka jingtohkit ka jongki ban lap, khamtam haba kila kam ba ka shim por tang 4 sngi bad wat hapoh 4 sngi ruh ka jinglong jingman jong ka sohkha ka long kaba lyngkot bha. Kumno ka dohkha ka iai bteng ban i kum kaba dang bha wat kala don bun sngi kadei ka jingkylli kaba eh bha.

Kala kyntu ia ki paidbah ba kidei ban bam ia ki dohkha kiba pynmih hi na ka jylla bad kidei ban long kiba husiar ban bam ia ki dohkha kiba wanrah na ka lynti kaba jngai bah.