Imphal, Jylliew 27: Ki shipai Indian Army kila pynaw ia ka jingsngewkhia kaba jur namar ka jingmih paidbah ki Kynthei ban pakhang lynti ia ki shipai ha man ki jaka ba ki thmu ban leit khynra ia ki kynhun kaikhlaw bad ki runar kiba pynpur ia ka jingiakynad pher jaidbynriew.
Ki shipai lyngba ka twitter kila ong ba kum kine ki jingpynthut ki Kynthei kala ktah jur ia ka jingleit khynra biang por jong ki shipai ha ka por ba donkam ban leit iada ia ki mynsiem briew bad ki nongkynti.
Ki shipai kila kyntu ia baroh ki nongshongshnong ba kin ai ka jingkyrshan ia ka sienam ba ki shim ha kaban lah wanrah pat ia ka jingsuk ha ka thain.
Haba kren halor kane ka jingjia, ki shipai kila pynsaphriang ruh ia ki video bala ring ha kiba bun ki jaka, kiba pyni ia ka jing mih ki kynthei ban khang ia kishipai ba kin hiar sha ki shnong kiba mih ki jingiakynad.
Ka khubor ka ong ruh ba ha kine ki video la iohi ruh ia ki kali kiba kit ia ki nongiakhih bad ki tiar ki tar ia kaba la synran da ki Kynthei. Nalor kata,la pyndonkam ruh wat ia ki ambulance ban kit ia kine ki nongiakhih.
Ki shipai kila ong ba kane ka jingpakhang lynti ia ka iaid ka ieng ki shipai ym tang ba ka pynkhein ain hynrei ka pynkhein poh ruh ia ka jingpyrshang jong ki ban wanrah pat ia ka shongsuk shongshngain ha Manipur.
Pule ruh: Manipur : Bynniaw jur ki shipai ba pakhang lynti ki Kynthei ban hiar pynlong ia ki jingkhynra
