Guwahati, Jylliew 27: Ka pakhang shnong ba 12 kynta kala ktah jur bha ia ka rukom im ki briew ha Barak Valley, Assam, kaba la pynlong kum shibynta n aka jingiakhih ban pyrshah ia ka Delimitation Draft (ka jingthmu phiah constituency) jong ka Election Commission of India (ECI).
Ki Pulit kila kem haduh 300 ngut ki nongiakhih na ki lai tylli ki District ka Barak Valley.
Ia kane ka pakhang shnong la khot pynlong da ka seng sain pyrthei Barak Democratic Front, kaba la ioh pat ia ka jingkyrshan na kiwei ki seng kum ka Congress, TMC bad ka AIUDF.
U President ka Congress na Cachar District Committee Abhijit Paul ula shah kem ha ki Pulit ha ka step sngi ba-ar na ka surok jong ka Silchar. U Working President ka APCC Kamalakhya Dey Purkayastha ruh ula shah kem.
Kat kum ka jingong u Paul, ki Pulit kila pynbor ia ki nongkhaii ba kin plie ia ki dukan bad bthah ia ki trai jong ki kali kamai ba kin phah ia ki kali ban kamai khnang ban pyni ba kam don satia ka pakhang shnong.
U Paul ula bynrap ba kane ka jingleh ki Pulit kala pynkhuslai bha namar ha ka jingiakhih u snem 1961 halor ka ktien ka thylliej, ki Pulit ka Assam kila ther kuli sha ki nongiakhih kaba lam sha ka jingiap ki 11 ngut ki samla.
Kane ka pakhang shnong ba 12 kynta kala sdang naduh ka por 5 baje hynne ka sngi ba-ar bad kala ioh ia ka jingkyrshan ba pura na ki paidbah. Ki surok kila kynjah jar jar bad jan baroh ki dukan kila khang khyrdep ha baroh lai tylli ki District ka Barak Valley.
Pule ruh: Pom u pyrthat ia kawei ka Longiing, mynsaw 6 ngut kynthup I Khunlung
