Imphal, Jylliew 25: U Myntri Rangbah ka Manipur N. Biren Singh hynne ka sngi U Blei ula pyntip ba u Myntri kam Pohiing ka Ri Amit Shah, ula kular ba ka Sorkar Jylla kan shim ia kat kiba don ki sienjam ha kaban wanrah pat ia ka jingshongsuk ha Jylla Manipur.
Haba iakren bad ki nongthoh khubor ha New Delhi, u Singh ula iathuh ba u Amit Shah ula ai jingmut ban pynkhlain ia ka kam ha kaban wanrah pat ia ka jingsuk ba shirta bad pan ruh ia ka jingiatreilang na baroh ki kynhun ha Manipur, ban pynthikna ba ka jingsuk kan don ha Jylla.
“Nga la iakynduh ia u Myntri kam Pohiing Amit Shah ha New Delhi mynta ka sngi bad batai ha u halor ki jingjia jingman ba long mynta ha Manipur” ong u Biren Singh hapoh ka twitter.
U Myntri Rangbah ka Manipur ula hiar sha Delhi hadien jong ka jingialang ka All Party Meeting bala khot pynlong da u Myntri kam Pohiing ha Delhi.
Ha kane ka jingialang ba long hynnin ka sngi Saitjain ha Delhi, u Amit Shah ula pyntip sha baroh ki Nongialam sain pyrthei b aka Sorkar kan shim ia ki sienjam halor ki jingai jinglut jong ki seng sain pyrthei.
Naduh ba thma iapher jaidbynriew ha Manipur kala khie naduh ka 3 tarik Jymmang, kane ka dei ka sien leit New Delhi kaba ar jong u Myntri Rangbah ka Manipur ban iakynduh bad ki Myntri ka Sorkar Kmie lem bad ki Nongialam.
Pule lang ia kane: Byrngem iakhih ki Nonghikai ha EJH lada ym pynsangeh pyntreikam ia ka Ubiattendance App
