Nongstoiñ, Jylliew 25: Ka Sorkar Jylla kala pynpoi ia ka song jingiarap ba T. 8 lak sha ka Longiing i Heprit Cafina bad Maianylla Nongsiej, ki dkhot ka kynhun rwai Choir ka Kids Tarari, kiba khlad na ka jingtwa khyndew dang shen ha Nongstoin.
Ka Sorkar Jylla kala ai ia kane ka song jingiarap na ka State Disaster Relief Fund. Ia kane ka pisa la pynthep ha ka account ki Kmie Kpa jong kine ki shipara.
U MLA Ka Nongstoin Bah Gabriel Wahlang ha ryngkat bad u Deputy Commissioner ka West Khasi Hlls Bah Garod LSN Dyke kila leit ban aiti ia ki kot ki sla bala pynthep ia kane ka pisa, ha ka sngi Saitjain ha ka jingiadonlang ki bahaiing hasem, ki Tynmen Basan bad Rangbah Balang ka Presbyterian Mawliangniang.
Shuwa kane, la pynlong ia ka Jingiaseng Duwai bala pyniaid da ka Balang ha ka jingiadonlang kine ki Nongmihkhmat naka Sorkar bad u MLA ka Nongstoin.
“Ngam shym wan tang kum uta u DC, hynrei nga wan kum u khun khasi khara ban sngewlem ïa phi ka ïing ka sem ha ka ba phi ïakynduh ïa kum kane ka jingjia ba sngewsih.
Kaei kaba la dep jia ngim lah leh ei ei shuh, hynrei kum kiba ngeit ngi ai ïa kata ka jingshaniah jong ngi ha u Blei. Hooid ki la leit noh hynrei haba ngi kylli shano ki la leit, ngi tip ba ki la leit sha kata ka jaka shong neh. Nga ngeit ba kata hi ka jingsngewthuh ba phi kum ka ïing ka sem ka don”, ong u Bah Garod.
“Nga pynpaw ka jingsngew burom shikatdei ïa u DC namar ha ka jingïakren ka jong ngi,u la long uba la kloi ban pyndep ïa kine ki jingdonkam. Ha ki por ba mynshwa lehse ka shim por ban ïarap sha kito kiba ngat ha ki jingjia ba sngewsih. Hynrei mynta pat ngi sngewkmen ban ïoh ïa u DC uba ïatreilang ryngkat, ha kaba tang khyndiat por eh, ngi la ïoh ban wan ban ïarap ïa kyrshan lem da ka mynsiem jong ka jingsngewlem”, ong u Bah Gabriel Wahlang.
Ula ong “Lada ngin ïakren ïa kata ka jingïarap ba ka sorkar ka la ai bad ka jingduh noh ïa ki mynsiem kam ïahap haei haei ruh. Hynrei, kane ka long tang ka bynta jong ka sorkar ba haba la duh ïa ki mynsiem briew lyngba ka jingleh jong ka mariang, donkam ban ai ki jingsngewlem”.
“ Ngi ruh haba ngi wan hangne ngi wan da ka jingsngewlem bad ban duwai lem na ka bynta ka ïing ka sem, ba u Blei u ba tip khambha ïa kiei kiei baroh, un don ryngkat bad un da ri sumar ïa ka ïing ka sem hi baroh kawei”, ong u MLA/MDC Nongstoiñ.
Pule lang ia kane: Ïoh ka KHADC T.13,88,65,803.00 ha u 2022-23 na ka bhah marpoh khyndew
