Tura, Jylliew 22 : Ka eriong ba jur kaba wan ha ryngkat u slap bad u pyrthat, kala lynshop hynne ka step sngi Palei ha Ri-lum Garo bad wanrah ia shibun ki jingjulor ha ka jingiaid lynti jong ka.
Naduh ka por 5 baje mynstep, ka eriong bad u slap kila syllad ia ka thain, kaba la wanrah ia ki jingtwa khyndew bad jingjulor ki nongkynti ha kylleng ki jaka ka Ri-lum Garo.
Kawei na ki jingpynjulor ba ishyrkhei bha ka dei kaba jia ha ka madan ialehkai jong ka PA Sangma Stadium ha Tura ha kaba u slap ula wanrah ia ka jingtwa khyndew ha kawei ka bynta jong kane ka madan.
Kane ka jingtwa kala pyntuid ia bun bah ka khyndew na ka madan ialehkai sha ka surok ba sha lyndet bad ba amrjan ka Complex barim ka Coal India Limited.
Ki bor District bad ki kynhun Emergency Response Team kila her wut wut sha kine ki jaka ba shah ktah ban peit thuh ia ka jinglong jingman bad ban ai jingiarap ia ki nongshongshnong.
La ioh khubor ruh ba ki don shibun ki Iing kiba la shah pynjulor, ki dieng ba khyllem bad ki surok kiba la shah khang lynti ha ka khyndew kaba twa ha kylleng ki jaka.
Ka PA Sangma Stadium kaba dei ka dak jong ka jingsngew sarong ia ka thain, kala long ka madan bala pynlong ia kiba bun ki lympung ialehkai bad ki tamasa bapher bapher.
Ki bor District kila trei borbah mynta ban pynkhuid ia ka khyndew ba twa na kane ka madan kaba la tap ia ka surok khnang ba ki kali kin lah ban iaid biang.
Ngi dang ap ban ioh shuh shuh ia ki jingtip.
Kiba bun ki jaka ha Ri-lum Garo kila ngam ha ka jingshlei um bad bun ruh ki surok kila kylla long ki jaka iaid lynti jong ka Um haduh ba ki wahduid kila kylla long ki wahbah. Wat ka Ganol Hydro Project kala hap ban pyllait ia ka um hynne ka sngi Palei namar ka jingpoi um puk puk.
Ki video kila saphriang ba wat kawei ka madan ialehkai phutbol ha Cherangre kala kylla long kum ka wah bah namar ka jingjur palat u slap.
Ki surok ha Rangol Wari ba pyniasoh ia ka Edenbari sha Tosekgre bad kiwei ki shnong ba sha shiliang wah, kala shah tap lup ha ka um.
Pule ruh: Byrngem ka RBYF ban khang tala ia ka Umsohlait Police Station ba khlem larkar
