Shillong, Jylliew 21 : U President ka Meghalaya Pradesh Congress Committee (MPCC) Bah Vincent H Pala hynne ka sngi Balang ula ong ba un iai neh beit bad ka Congress bad ka jingkylli kam mih satia ba un iakhun ia ka elekshon MP Lok Sabha na kiwei pat ki seng sain pyrthei.
“Kiba bun ki briew kila pyrshang ban pynkohnguh ia nga, kiba bun kila pyrshang ban khroh ia nga hynrei ngam dei uba tad dor. Nga la sdang kum u riew madan, ngam lah ban shu shah pynngop ha kiwei ki party. Ngan iai neh bad ka Congres bad ngan iai neh bad ka Congress satang lada ka Congress ka kynjat noh ia nga” ula ong haba iakren bad ki nongthoh khubor.
Une u MP ka Shillong ula jubab ia kane halor ka jingkynnoh jong u Myntri Rangbah barim bad Nongialam ka AITC Dr Mukul Sangma ba u (Vincent) don jingthmu ban pan ticket na ka NPP.
Haba kylli, u Bah Pala ula iathuh ba kila don ki nongtrei ka BJP, NPP bad kiwei kiwei kiba la wan khroh ia u ba un aireng na ki party jong ki ha ka elekshon MP sha ka Iingdorbar Lok Sabha ban long ha u snem 2024.
“Hynrei, ngan iai long kumba ju long. Ngam sngewpher la nga rem lane nga jop ia ka elekshon hynrei ngam dei ban pyndem ia ka hok jong nga, ngam dei ban pyndem ia ka jinglong jong nga, ngam dei ban pyndem ia kaei kaba ka Congress kala dep ai ha nga…namar ka jingkylli kam mih satia ba ngan iakhun na ka NPP ne kiwei kiwei ki seng. Ngan iai don bad ka Congress ban ban iakhun na ka Congress bad baroh na phi, phi deiban kyrshan khang ba ngan jop biang” ula bynrap.
Pule lang ia kane: Rakhe ka Jylla Meghalaya ia ka International Yoga Day
 don jingthmu ban pan ticket na ka NPP.){kind=link}