Imphal, Jylliew 21 : Ki paidbah ka Manipur kila pynlong ia ka jingiakhih da kaba iashong kyllain mungor, pyrta slogan bad thang tyngshop ha Manipur ban pynpaw ia ka jingpynrem ia u Myntri Rangbah Duh ka Ri Narendra Modi, halor ka jingsngap jar jar ia ki jingjia iaumsnam kiba la jia ha Jylla naduh ka 3 tarik Jymmang.
Ia kane ka jingiakhih la pynlong ha madan Thoubal Mela kum shibynta na ka jingrakhe ia ka International Yoga Day.
Haba iakren bad ki nongthoh khubor, u Rizoria Okram uwei na kiba iakhih ula ong ba u Myntri Rangbah Duh ula ialap ia ka khubor ka jingsuk jingsain ha ka pyrthei katba ula phai lyndet pat ia kane ka bynta jong ka Ri jong u, kaba la pluh ha kine ki 49 sngi bala leit noh.
U Rizoria ula ong ba da ki spah ngut ki briew kila shah pyniap bad da ki hajar kila mynsaw bad bun ngut kila jah rngai bad palat 5000 tylli ki Iing kila shah wiang ding bad palat 50,000 ngut ki briew kila phetwir.
Hynrei u Myntri Rangbah Duh u khlem lah wat tang ban thoh kawei ka khubor ha Twitter ba pynpaw ia ka jingsngewlem bad khlem kren eiei ruh wat tang shi kyntien ia kaei kaba jia ha Manipur, ong u Rizorio.
Ia kane ka jingiakhih la pynlong da kawei ka seng kaab khot ialade ka Thoubal Apunba Lub.
Pule lang ia kane: Hukum u Lat ban weng kam ia ki Nongtrei Sorkar bala kynjoh 70 snem
