Shillong Jylliew 15: U Convener ka Maitshaphrang u Bah Michael Syiem ula ong ba ka jingiohi jngai jong u Myntri Rangbah ka jylla Conrad K Sangma ban pynlong iaka Meghalaya kaba kynjoh ia ka ioh kot sha ka $10 Billion ha u snem 2028, kadei kaba lah ban pynurlong bad kaba dei ban ai mynsiem, tangba ka hap shim ia ki sienjam kiba dei, nalor ka jingkynshew ha ki kam ba lah pynmih pisa bad kaba kham kongsan eh ka long ban pynkupbor ha kaliang ka ioh ka kot ia baroh ki Khun jong ki longiing longsem, ban pynthikna ba kan don ka jingkiew sted ha ka ioh ka kot ka Jylla ba kan lah ban kynjoh ia kane ka thong.
“Namar ka la long kaba jynjar ban ioh iaki kam sorkar, kumta ka sorkar kadei ban thaw ia ki polisi treikam ban iakhun ia ka jingkiew jong ka jingbym iohkam iohjam ki samla da kaba bting lynti ia ki samla ba kin don iaka mynsiem ba kin trei shitom ban long ki nongseng kam lajong, ban ialeh ban thaw ia ki lad ban ioh kamai bha ban wad ia ki lad ki lynti da kaba pyndonkam ia ki buit ki bapher ban poi sha ka thong” ong u Bah Micheal haka kyrwohkhubor.
Ula ong ba iaid ha katei ka lynti ka long kaba kongsan iaka sorkar ba kan shim ia ki rai kiba kongsan ban pynkhein ia ki rukom treikam tynrai khnang ba kan long kaba iahap katkum ka jingdawa jong ka por.
Ula ong ka jingwanrah iaka aiñ Equitable Distribution of Ancestral and Self Acquired Property kan ai mynsiem ia ka jaidbynriew Hynniewtrep bad ki samla Garo ba kin pyndonkam iaka spah kaba la hiar pateng ban shim ia ka ram na ka bynta ban ioh seng ia ki kam ki jam ban ioh kamai kajih.
“Na ka bynta kito kiba wan na ki longing kiba don ba em ka spah ka phew, ka jingbei tyngka ka jongki ha ka kam khaii pateng kan kyntiew bun shah bad kan long ruh ka jingthaw ia kiba bun ki lad ban aikam aijam iaki samla trai ri, ki bym donkam donjam” la ong u Nongialam ka Maitshaphrang.
Ula ong, katba nang bun nang bun ki samla trai ri ki leh ia ki kam khaii pateng ha ka jylla bad kin don iaka bor ban pyniaid iaka ioh kakot jong ka jylla, kumta ka jingdon jingem jong ka jylla kan neh hi ha ka jylla bad ba kan kyntiew iaka ioh ka kot jong ka jylla bad kan pyllait naka jingtuid jong ka spah sha kiwei pat ki jylla, ia kaba kala ja ha baroh ki snem kiba la leit.
“Ka jingshim iaka sienjam kaba rit ha ka jingbhah iaka spah lyngba ka Ancestral & Self Acquired Property ha ka longiing longsem da kaba kynthup lang iaka jingdon iaka sap ka phong jongki samla bad ka jingdon byllai ia ki mar hapoh ka jylla, kan iarap shibun bha ban kyntiew iaka ioh ka kot jong ka jylla bad kan iaid ruh ha kata ka lynti ban pynurlong shisha iaka jingangnud jongu Myntri Rangbah ka jylla u Conrad K Sangma” la pynkut u Bah Micheal Syiem.
