Kyntait u Bah Paul ia jingkynnoh ka MSCW : Ngin thung Chairperson da ka bym kyrsum Politics

Shillong, Jylliew 15: U Myntri ka Tnad Social Welfare Bah Paul Lyngdoh hynne ka sngi Palei, ula kyntait ia ki jingkynnoh ka Meghalata State Commission for Womens (MSCW) bad ong “Nga khlem pynmih ia ka hukum ban weng kam ia ka Chairperson ka Commission tang na ki hamsaia”.

U Bah Paul ula ong ruh ba ka Sorkar Jylla kan sa thung noh mynta ia ka briew ka bym don jingiadei ha ki kam sain pyrthei kum ka Chairperson ba thymmai ka Meghalaya State Commission for Women (MSCW) haba pyntip ba ka Tnad Social Welfare kan sa thaw iaka Search Committee ban thung ia kane ka Chairperson ba thymmai.

Haba iakren bad ki lad pathai khubor, u Bah Paul ula ong “ Ki jingkdew kila mih bunsien ha ki lad pathai khubor ba balei phi jied ia ki briew na ki seng sain pyrthei, kane ka dei ka mat ba phi ju iakren bha bad mynta ka jingthmu jong ka Sorkar ka long ba kan thung ia ka briew ki bym don jingiadei bad ki seng sain pyrthei, kaba lah treikam, kaba sngewthuh ia ka jingeh ki kynthei” ula ong.

Haba kdew ia ka jingkynthoh ka MSCW, u Bah Lyngdoh ula ong “Nga khlem pynmih ia ka hukum tang na ka jingioh khubor bad jingiakren ki briew. Nga la pule bniah ia ki file. Ka don ka kaiphod bala batai shai baka Chairperson namar baka bat ia ka kam, ka dei ban iadonlang haduh 4 tylli ki jingialang ka Commission. Ki noting jong ki files kila batai da kumwei nalor baka don ruh ka jingujor pyrshah ia ka (Chairperson) ba ka iashimbynta ha ki jingialap elekshon”.

“Nga la pule iaki kyndon jong ka Women Commission Act. Nga la pule lut ia ki file noting bad nga tip ia kaei kaba nga leh hynrei ka long ruh kaba kongsan ia nga ban ong ba kum ka briew kaba la bam smai ha ka kyrteng u Blei ban treikam khlem ka jingsheptieng ne shah liang, jingsngew ieid ne shun, nga jied ban trei ia kaba dei ban ia kaba pawnam” ula ong.

Haba kylli, u Bah Paul ula ong “ Kane ka long ruh shibynta jong ka jingtohkit bad lah dep ruh ban ai show cause sha ka (Chairperson) ba ka iashimbynta ha ki jingialap elekshon. Ngam don eiei ban kren pyrshah ia ka briew hynrei nga kren ia kane ka kam na ka jingiohi ba haba phi shong ha ka shuki, phi dei ban don shibun ka por ban aiti ialade ha ka kam bala bynshet bad lada phi don liang ruh bad ki seng sain pyrthei, ka jingpynleit jingmut jong phi ruh kala iaphiah noh”.

Ha kajuh ka por, u Myntri ula ong ruh ba un sa pyntip ha ka jingialang jong ka Kynhun Myntri halor kane ka kam bad un sa batai ruh ia kid aw baroh.

Haba kdew ba ka kong Phidalia Toi (Chairperson ba shah weng kam) ka dang don sa shisnem ban pyndep ia ka samoi treikam, u Bah Paul ula ong “Ka dei ka jingkhate kaba shonghol. Ngin sa wad noh ia ka Chairperson ba thymmai”.

“Ngan sa iakren bad u Myntri Rangbah ka Jylla bad hadien kane, ngin sa rah ia ka mat sha ka jingialang jong ka Kynhun Myntri ban batai ia kaei kaba jia bad ruh ban shim ia ki jingai jingmut na ki dkhot ka Kynhun Myntri” ula bynrap.