Tura, Jylliew 13 : Uwei u briew ula pyniap iala ka jong u hynmen da kaba dung da ka Tarik ha ka thain Monabari, South West Garo Hills, kaba don ha khappud Mankachar, Assam ha ka janmiet sngi Ba-ar.
Kane kala jia ha ka shnong Ichakuri kaba hap hapoh ka Monabari Police Outpost. La iathuh ba u ne briew ba leh ia kane ka kam bymman u kyrteng u Ajadul Islam ba 28 snem bad u hynmen uba shah pyniap u kyrteng u Akirul Islam ba 32 snem.
Kane ka jingjia kala jia namar ka jingiahuri hura hapdeng jong ki hapoh ka iingsah, kaba lam sha u pud ba u para un sei da ka tari ban dung iala u hynmen shabar ka Iing.
Une u para hadien ba ula dep dung, ula pyrshang ban iarap iala u hynmen da kaba rah ia u sha Mankachar CHC, Assam hynrei u doktor ba don ha Hospital, ula pynbna ba u Akirul ula khlad noh ha lynti.
Ki Pulit kila kem ia u Ajadul bad ka jingtohkit mynta kala iaid shakhmat.
