Shillong, Jylliew 12: Ka Iingkashari Meghalaya High Court kala bthah ia ka Tnad Pulit ban shim ia ka sienjam kat kum ka ain pyrshah ia ki trai jong ki karkhana coke ba beain ha Jylla.
“La kymrne ba ka Tnad Pulit kan shim ia ki sienjam ba donkam kat kum ka Ain bad ban pynsted ia kane ka kam khlam kloi kat kaba lah” ong ka Iingkashari Full Bench bala khlieh da u Chief Justice Sanjib Bnerjee ha ka hukum hadien ba shong bishar ia ka PIL jong kane ka kam.
Kane kala mih ruh hadien ba u Director General of Police (DGP)Dr LR Bishnoi ula pyntip ba bun na ki trai jong ki karkhana coke ki dei kiba don ha Assam.
“Ki trai/nongpyniaid ia kine ki karkhana coke ba beain—bun ki dei kiba treikam ha Assam bad kila pynieng ia kane ka kam beain ha Meghalaya ha kaba bun ruh ki kam benami kila mih pyrthei” ong u DGP ha ka affidavit bala file hapoh ka Iingkashari.
U Nongmudui Shailendra Kumar Sharma ula ong ba bun ki kingpin ki dei kiba ia iathuh iathaw bha bad bun kila shu iashang laitluid ha Guwahati.
Ka Iingkashari kala bthah ia u DGP ban nang ai shuh shuh ia ka kaiphod hapoh ka lai taiew halor ka sienjam ba ka Tnad Pulit kala leh.
Ha kajuh ka por u Justice BP Katakey ula aiti ruh ia ka interim report ba 14, kaba kdew biang ia ka jingheh iew jong ki karkhana coke bad ki ferro alloy ha Jylla.
Kat kum ka kaiphod, ki don haduh 13 tylli ki karkhana coke kiba treikam ha East Jaintia Hills bad 38 tylli ki karkhana coke ki bym pat shym la treikam.
Ha West Jaintia Hills bad South West Khasi Hills kila don haduh 2 bad 6 tylli ki karkhana coke ki bym shym la treikam. Ha West Khasi Hills kila don haduh 4 tylli ki karkhana coke kiba treikam bad 61 tylli ki bym treikam satia.
