Aizawl, Jylliew 12 : Ka Sorkar Mizoram kala pan ia ka song jingiarap ba kot T. 10 klur na ka Sorkar Pdeng ban ai jingiarap ia ki 10,700 ngut ki briew kiba wan phetwir na Jylla Manipur, kaba don hapdeng ka jingthma iapher jaidbynriew naduh ka 3 tarik u Jymmang.
U Myntri kam Pohiing ka Mizoram Lalchamliana ula pyntip ba ka Sorkar Jylla kala dep thoh sha ka Sorkar Pdeng ban ai song jingiarap ba T. 10 klur sha ka Jylla ba kan lah ban ai jingiarap bad jaka riehtngen ia ki phetwir na Manipur.
Ula pyntip ba u Myntri Rangbah ka Jylla Zoramthanga ula dep thoh haduh artylli ki shithi sah u Myntri Rangbah Duh Narendra Modi ha ka 16 tarik bad 23 tarik Jymmang. “Ka Sorkar Pdeng kam pat ai jubab satia ia ka jingkyrpad jong u Myntri Rangbah ka Jylla” ong u Lalchamliana uba bat ia ka tnad Disaster Management and Rehabilitation, haba iakren bad ki nongthoh khubor.
Ka Mizoram ka don haduh 95 km u khappud bad ka Jylla Manipur bad ki jaidbynriew Kuki-Mizo-Hmar-Zomi kiba ju iatip kum ki Kukis lane Zp Hnahthlak (paid riewlum Zo) ha Manipur ki don ka jingiadei ha ka snam bad ki Mizo ha Mizoram.
