Shillong, Naitung 07: U MDC ka Congress na Mawhati Bah Charles Marngar hynne ka sngi ula dawa ia ka Sorkar Jylla ba ka dei ban pyniadon bynta lang ia kynhun bapher bapher ha ka jingiasyllok hashuwa ban shong bishar ne iapynbeit ia ka jingiakajia pud ha ki jaka ba hap hapoh Block-I bad Block-II.
Haba kren sha ki nongthoh khubor, u Bah Charles ula ong ba ka long ka jingaimynsiem ban tip ba ka Executive Committee (EC) jong ka KHADC ka iatylli kawei haba iadei bad ka Memorandum of Understanding (MoU) bala iasoi hapdeng ka Sorkar Meghalaya bad ka Assam.
U Bah Charles ula ong ba haduh mynta, kam pat don satia kano kano ka sienjam bala shim ban iashong bishar ia u pud u sam jong ki Shnong kiba hap hapoh ka Block-I bad Block-II.
Hynrei ula ong ba watla ka kylla iapynbeit pud kaba ar kam pat sdang satia, hynrei ka Sorkar Assam kala shim ia ki sienjam ban kyntur pud sha Meghalaya.
“Ka Sorkar Jylla ka dei ban pyniadonbynta lem ia ki kynhun bapher bapher haba shong bishar ia kane ka thain bad ki shnong jong ka Block-I bad II namar kine ki jaka ki dei kiba donkam bha haba phai sha ka jingiakajia pud” ong u Bah Charles.
U Bah Charles ula ong ba ka long kaba donkam ba baroh ki MDC kin iatylli haba phai sha ka jingiakajia pud bad dei ruh ban shim ia kawei ka rai da ki Dkhot ka District Council kaba dei ka nongri nongsumar ia ka khyndew ka shyiap ha Jylla.
Une u MDC ula bynrap ba watla bun ki MDC kila mih shakhmat ban pynbna ba ki kyrshan ia ka MoU hynrei kine ki Dkhot kim dei ban shu khmih tang hala ki jong ki Constituency ki bym shah ktah ha kane ka jingiakren pynbeit pud hynrei ban peit ruh sha kiwei kiwei ki Constituency.
