Shillong, Jylliew 06 : U Myntri Rangbah ka Meghalaya Conrad K Sangma bad Assam Himanta Biswa Sarma, kila pynbeit ba kin iahiar jurip lang ha ka taiew ba khatduh jong une u bnai ba mynta ia ki jaka iakajia ka West Jaintia Hills bad Karbi Anglong.
“Ka jingiajurip lang kan long haba kut ka taiew u bnai Jylliew” ong u Conrad haba iakren bad ki nongthoh khubor hynne ka sngi Ba-ar.
Ula ong ba ki arngut ki Myntri Rangbah kin sa leit sha ki katto katne ki jaka kiba kham jur ka jingiakynad. “Ka jingthmu hi ka long ban pynheh mynsiem ia ki briew ha kitei ki jaka bad ruh ban phah ia ka khubor ba ngi la shimkhia halor ka jingwad ia ka lynti ban pynbeit ia kane ka jingeh ha khappud” ula bynrap.
Ka jingialang ba nyngkong hapdeng ki Myntri Rangbah kine ki artylli ki jaka kaba dei na ka bynta ka kylla kaba ar jong ka jingiakren pud ban pynbeit sa ia ki hynriew tylli ki jaka ba iakajia, kala long ha ka 24 tarik Jymmang ha Guwahati.
Kane ka jingialang kala rai ba kine ki arngut ki Myntri Rangbah kin sa ialeit jurip lang sha West Jaintia Hills bad Karbi Anglong ha u bnai Jylliew ban ai mynsiem pat ia ki briew ha kine ki jaka, kaba don hapdeng ka jingbym shongsuk na ka jingiakynad ba mih hapdeng ki Karbi bad ki Khasi-Pnar.
