Shillong, Jylliew 05: U Myntri ka Tnad Tourism Bah Paul Lyngdoh hynne ka sngi Nyngkong, ula ong ba ka Sorkar Jylla kala rai ban pyntreikam ia ka Shillong Ropeway Project kat kum ka ‘European Standard’ ne ka rukom pyntreikam ha dewbah Europe.
Haba iakren bad ki nongthoh khubor, u Bah Paul ula pyntip ba ula iakynduh ia laingut ki heh Ophisar ka Switzerland ban iakren ia kane ka kam ha ka jingleit iuhkjat sha kane ka Ri dang shen.
“Ka jingthmu jong ka jingleit sha Switzerland ka long ban pynkloi ia ka jingtreikam jong ka Shillong Ropeway Project, kaba dei ka project ba T. 140 klur ba bei tyngka da ka Asian Development Bank” ula ong.
Haba pynpaw ba ka Shillong Ropeway Project kan dei kawei na ki project Ropeway bah eh duh ha ka thain Shatei Lam Mihngi ka Ri, u Bah Paul ula ong “Ngi khmih lynti b aka jingwan kai jong ki nongshang sawari kan nang bun sha Jylla bad ka kam jngohkai kan dei kawei na ki lad aikam bah eh duh ia ki paid nongshongshnong ka Jylla”.
Kat kum ka jingong jong u, ha Sohra ki trai iing kiba ju kamai T. 3000 shibnai kum ka baiwai, kila kamai mynta haduh T. 3000 shisngi na kawei ka kamra.
“Ka jingleit jong ngi sha Switzerland ka dei hadien ka jingshah khot sngewbha ha ka Sorkar ka Switzerland. Ngi la iakynduh ia lai ngut ki Ophisar bala rangbah ka Switzerland bad ka jingthmu hi ka dei ba ngi kwah ban pyntreikam ia ka project kat kum ka European Standard” ong u Myntri.
Haba kynthoh ia ki jingkynnoh ba ula kiar ban kren eiei halor ka Reservation Policy, u Bah Paul ula ong “Ngam lah ban shu pynsangeh noh ia kine ki jingialang tang halor ka nongrim ba ki don ki briew kiba shong shah jingit ha Shillong bad ba nga hap ban wan mareh bad pynsangeh noh ia kine ki jingiaang kiba la ai jingbit da ka Ministry of External Affaird”.
Haba pyntip ba ka Shillong Ropeway Project kan sdang ha u bnai Nailar mynta u snem, u Myntri ula ong “Ngin sa sdang noh ia ka jingkhot tender bad kyrmen ba shuwa u Nohprah, ngin sa lah ban pyntrei ia ka kam bad kan shimpor ia ngi kumba arsnem ban pyndep ia ka”.
