Imphal, Jylliew 4: U Myntri kam Pohiing ka Ri Amit Shah hynne ka sngi U Blei ula kyntu ia ki paidbah ka Jylla Manipur ba kin weng noh iaka jingpakhang ia ka surok Imphal-Dimapur bad ka National Highway-2.
Haba kynthoh hapoh ka Twitter, u Amit Shah ula kyntu jur ia ki paidbah ban weng noh ia kine ki jingpakhang surok khnang ban lah pynpoi marbam, dawai, petrol/diesel bad kiwei kiwei ki jingdonkam sha ki nongshongshnong jong ka Jylla.
Ula kyntu ruh ia ki Sengbhalang ba kin leh ia kaba donkam ha kaban wanrah ia ka jingmynjur halor kane ka kam.
U Shah haka Twitter ula ong “Tang ka jingiatreilang kaba lah ban wanrah pat ia ka jingshongsuk ha kane ka Jylla kaba itynnad”.
Hynne ka step, u Security Officer ka Sorkar Manipur, Kuldeep Singh ula ong ba ka jingshongsuk kala sdang ban wan phai ha Jylla hadien bala lah ban tehlakam ia ki jingiakajia bad iaumsnam pher jaidbynriew.
Ha ka sngi Thohdieng, ki Pulit ka Manipur kila ong ba haduh 140 tylli ki tiar siat la wan ban pyndep pat ha kylleng ki jaka jong ka Jylla hadien ka jingkyrpad jong u Myntri Kam Pohiing ka Ri Amit Shah uba la wan iuhkat 4 sngi hapoh ka Jylla.
U Amit shah ha ka jingiakren bad ki lad pathai khubor, ula kyntu ia baroh ki jaidbynriew ba don ha Manipur ba kin pynneh noh ia ka jingshongsuk bad ban iakren sngewthuh ha kaban wanrah ia ka jingiashong shngain baroh lang.
Ula maham ruh ban leh tyngeh ia kito kiba shem ba ki don tiar siat ha ka jingkhynra jong ki Pulit.
